Përgjimet e SPAK/ Arben Kraja: Janë përgjuar zyrtarë të të gjitha niveleve
Prokuroria e Përgjithshme ka deklaruar se për një vit të gjitha prokuroritë në vend përgjuan 3664 shtetas shqiptarë. Sipas të dhënave, rezulton se gati gjysma e tyre u përkasin përgjimeve të kryera nga SPAK.
Drejtuesi i Prokurorisë së Posaçme kundër Krimit dhe Korrupsionit, Arben Kraja, në një deklaratë për shtyp tha se pjesë e këtyre përgjimeve kanë qenë zyrtarë të të gjitha niveleve drejtuese në vend.
Kreu i SPAK, Arben Kraja deklaroi: “Po t’i shohësh statistikat, janë më shumë në pjesën që lidhen me korrupsionin dhe krimet që lidhen me të, por sipas parametrave që parashikon ligji”.
Kur u pyet për nivelin që kanë zyrtarët, të cilët ishin të përfshirë në përgjimet e SPAK gjatë vitit 2021, Kraja tha se: Të të gjitha niveleve. Po thashë emra pastaj, ç’kuptim ka! Por i pyetur se a kanë qenë efektive këto përgjime, Kraja u përgjigj se: Patjetër! Janë një mjet për sigurimin e provave, një mjet për hetime proaktive brenda direktivave të Bashkimit Europian i rekomandohet SPAK-ut që të përdori sa më shumë hetime proaktive.
Nga përllogaritjet rezulton që SPAK-u ka përgjuar gjatë në vitin 2021 afërsisht mbi 1500 zyrtarë të niveleve të ndryshme, disa janë arrestuar për çështje të ndryshme.
Kujtojmë se gjatë vitit të kaluar me urdhër të SPAK u arrestua ish-kryebashkiaku i Lushnjës, Fatos Tushe, dhe disa zyrtarë të kësaj bashkie që diskutojnë për gati çdo gjë nëpër bisedat telefonike. Për këtë vit me përgjime dhe mënyra të tjera, SPAK-u dërgoi në paraburgim ish-ministrin e Mjedisit, Lefter Koka, ish-sekretarin e përgjithshëm, Alqi Bllako, dhe një grup ish-zyrtarësh të tjerë të përfshirë në çështjen e Inceneratorëve. Një çështje e diskutueshme ka qënë ajo e Rovena Vodës, ish-zëvendës ministre e Brendshme, emri i së cilës u zbardh u vu nën akuzë për ryshfet pasi pranoi një arkë me peshk dhe një telefon. Gjithashtu, nga përgjimet ka përfunduar në burg edhe prokurori i Kukësit, Edmond Karriqi, dhe prokurori i Sarandës, Sali Hasa.
Discussion about this post