I moshuari u dogj brenda, fqinjët: Ishte i paralizuar, policia erdhi vonë

Banorët e lagjes ku ndërroi jetë i moshuari Sabri Serdari në Gramsh, kanë zbardhur detaje tronditëse.

Ata tregojnë se 73-vjeçari ishte i paralizuar dhe nuk mund të lëvizte. Kur ka rënë zjarri në shtëpi ai ishte vetëm, pasi e shoqja kishte 2 orë që ishte larguar. Fëmijët e tij jetonin jashtë vendit.

Fqinjët thonë se e kanë parë zjarrin shumë vonë dhe nuk kishin mundësi ta shpëtonin. Sipas tyre autoritetet kanë shkuar shumë vonë për të shuar zjarrin.

“Policia ishte shumë me vonesë. Ai  ishte i sëmurë dhe i shtrirë brenda. Flaka e mbyti menjëherë.  Gruaja e tij nuk ishte aty, kishte ikur prej 2 orësh. Nuk dëgjuam asgjë. Vetëm kur pamë flakën dhe nuk arritëm dot ta shpëtonim”, shtoi një fqinj.

“Fëmijët i kanë jashtë. Ishte në krevat nuk lëvizte. Ne e pamë nga fundi zjarrin”, tha një tjetër.

Vijojnë hetimet për të zbuluar shkaqet e zjarrit.