Një 25-vjeçar shqiptar, i cili rezultonte me precedentë penal dhe pa dokumente në Itali, ka rënë në prangat e Karabinierëve të Bolonjës pasi ju gjendën 13 kg kokainë.
Sipas mediave vendase, pasditen e vonë të së martës (26 prill), një patrullë policie kontrolloi një makinë të vogël të drejtuar nga 25-vjeçari shqiptar, i cili i ra në sy pasi kishte një qëndrim shumë nervoz.
Në përfundim të operacioneve të kërkimit të makinës, të kryer edhe me ndihmën e njësive të qenve, u gjet një zgavër e punuar me dorë poshtë sediljes së pasme të makinës. Brenda kishte 13 pako drejtkëndëshe kokainë, rreth një kilogram secila, të mbyllura dhe të paketuara me kujdes.
Shqiptari u arrestua dhe u dërgua në burgun e Bolonjës. Përveç kokainës, janë sekuestruar edhe dy telefona dhe 350 euro.
Discussion about this post