3 policë të burgut në Kavajë janë vënë në pranga, pas vetëvrasjes së të riut Ilvi Meta brenda në qeli. Sipas burimeve, të arrestuarit janë Bexhet Berberi, me detyrë inspektor; Rushit Kola, me detyrë inspektor dhe Petrit Brahimaj, me detyrë nën komisar. Sakaq, mësohet se Berberi dhe Kola kanë qenë policë roje tek dhoma e paraburgimit.
Vetëvraja e një 31 vjeçari në ambientet e Komisariatit të Kavajës mbrëmjen e së mërkurës ishte një lajm tragjik që tronditi shoqërinë shqiptare. Ilvi Meta, i cili ishte arrestua ditën e mërkurë rreth orës 12:00 i ka dhënë fund jetës brenda qelisë duke u vetëvarur, vetëm 6 orë pas shoqërimit nga ana e policisë. I riu u ndalua me akuzën për vjedhje, akuzë për të cilën ishte dënuar edhe më parë.
Ndërkohë menjëherë pas kësaj ngjarjeje të rëndë është ngritur një grup hetimor, si dhe kanë shkuar me urgjencë në Komisariatin e Kavajës Drejtori i Policisë së Qarkut të Tiranës, Lorenc Panganika, dhe disa oficerë të SHÇBA-së. Lidhur me këtë ngjarje të rëndë ka reaguar edhe babai i viktimës Ilvi Meta, Agim Meta, i cili hedh akuza ndaj policisë, ndërsa ka deklaruar se djali i tij u akuza për vjedhjen e një dere alumini.
Discussion about this post