Amnesty International deklaroi se ka dokumentuar krimet e luftës të kryera nga ushtria ruse në zonat përreth kryeqytetit ukrainas, Kiev, duke kryer ekzekutime arbitrare, bombardime të zonave të banuara dhe raste të torturës.
“Llojet e krimeve të kryera nga forcat ruse që ne kemi dokumentuar përfshijnë edhe sulme të paligjshme dhe vrasje të qëllimshme të civilëve”, tha sekretarja e Përgjithshme e Amnesty International, Agnes Callamard.
“Është thelbësore që personat përgjegjës, përfshirë zinxhirin komandues, të dalin para drejtësisë”, shtoi ajo.
Amnesty International tha se ka mbledhur të dhëna dhe dëshmi në tetë qytete pranë Kievit, përfshirë edhe në Buça. Pas tërheqjes nga forcat ruse në Buça në muajin prill, në rrugët e qytezës u gjetën kufoma njerëzish, shumica e të cilëve ishin lidhur si dhe u zbuluan varreza masive.
Guvernatori i rajonit të Kievit, Oleksandr Pavlyuk, tha se mbi 1,235 trupa civilësh janë gjetur në këtë zonë. Në raportin përshkruhet vrasja në Buça e Yevhen Petrashenko, 53 vjeç, i cili ishte qëlluar për vdekje në kuzhinën e tij, teksa gruaja dhe fëmijët e tij ishin fshehur në bodrum. Forcat kishin lejuar gruan e tij, Tatiana, që të hynte në banesë, ku ajo gjeti trupin e pajetë të burrit të saj.
“Yevhen u gjet i vdekur në kuzhinë. Ai ishte qëlluar në shpinë. Trupi i pajetë i tij qëndroi në banesë deri më 10 mars, kur ne ishim në gjendje ta varrosnim në oborrin tonë”, tha Tatiana.
Në raport është dokumentuar edhe vrasja e Leonid Bodnarchuk, 44 vjeç, i cili ishte duke ngjitur shkallët në momentin kur forcat ruse sulmuan me granatë. Sipas Amnesty International ekzekutimet në Buça janë kryer nga armë të specializuara që përdoren nga disa njësi elite ruse.
Hulumtimi i Amnesty International po ashtu ka përshkruar bombardimet në qytetin e Borodijankës, ku të paktën 40 persona janë vrarë nga bombardimet që kanë shkatërruar tetë ndërtesa banimi.
Discussion about this post