Ditën e sotme është zbardhur dosja hetimore për ngjarjen e rëndë të ndodhur mbrëmjen e 4 majit në Komisariatin e Kavajës, ku u vetëvra 31-vjeçari Ilvi Meta, i shoqëruar për vjedhje. Ndërsa Gjykata ka lënë në burg tre policët e komisariatit të Kavajës. Në burg janë lënë policët Petrit Berhamaj, Bexhet Berberi dhe Rushit Kola pasi akuzohen për shpërdorim detyre.
Gjithashtu, në dosjen e zbardhur të punonjësit të policisë Rushit Kola, i cili ka parë i fundit Ilvi Metën, janë zbardhur detaje nga momenti i shoqërimit të të ndjerit në Komisariatin e Policisë Kavajë, deri në momentin që u gjet i vetëvrarë. Polici është shprehur se kominikimin e fundit e kishte pasur me Ilvi Metën rreth orës 19:00, kur Kola e ka pyetur Metën se çfarë po bënte dhe Meta i ishte përgjigjur që po kryente nevojat personale. Ndërsa në deklaratë polici është shprehur se nuk e dinte se ku e ka gjetur Ilvi Meta litarin që kishte var veten.
“Dëshmia e policit: Ju mor deklarim punonjësit të policisë Rushit Kola, i cili deklaron se; Është punonjës policie me detyrë shërbimi në dhomat e sigurisë pranë Komisariatit të Policisë Kavajë, në këtë detyrë është prej 4 vitesh dhe ka një eksperiencë pune në Polici prej rreth 30 vitesh. Ka qenë i planizuar me trup shërbimi në dhomat e sigurisë në komisariatin e Policisë së Kavajës, turni i dytë nga ora 13:30 e datës 04.05.2022 deri në orën 22:00 të datës 04.05.2022. Në momentet e para kur ka marrë detyrën, i ndaluar ka qenë vetëm një shtetas për pijë alkolike. më pas ka ardhur i ndaluar shtetasi Ilvi Meta, aty e ka sjellë oficeri i rojës Petrit Berhani. Pasi e ka futur brenda, e ka mbështetur për muri, i ka hapur krahët, i ka hequr kapelen dhe i ka bërë kontroll fizik për sende të ndaluara. Pasi nuk ka konstatuar asgjë e ka futur tek dhoma numër dy dhe ka vazhduar shërbimin normalisht. Herë pas here shkonte dhe shikonte dy të ndaluarit, siç e ka detyrë funksionale. rreth orës 18:30, familjarët e Ilvi Meta kishin sjellë ushqim që e ka afruar oficeri i rojës tek ai. Pasi ka kontrolluar ushqimin ja ka dhënë Ilvit dhe ka vazhduar shërbimin. Pasi mbaroi ushqimin ka shkuar i ka mbyllur dritaren nga mbrapa, pasi Ilvi i ka thënë se ka ftohtë. Ka vazhduar shërbimin dhe në një moment pas orës 19:00 e ka pyetur se çfarë po bënte dhe i është përgjigjur se po bënte nevojat personale pranë sifonit. Ai ka vazhduar shërbimin. Pas disa minutash e ka parë në këmbë, i ka folur dhe Ilvi nuk i është përgjigjur, i ka bërtitur prapë dhe nuk ka reaguar dhe në këtë moment i ka rënë butonit për të lajmëruar oficerin e rojës. Erdhi oficeri rojës dhe unë i kam kërkuar çelësat por oficeri i rojës i kishte ngatërruar dhe Rushiti ka vajtur shpejt tek salla ka marrë çelësat dhe ka ardhur re ka hapur dyert. Kur ka hapur derën ka parë që shtetasi Ilvi Meta ishte varur në kangjellat e hekurit ku ishte kapur me një dorë dhe kur e sheh kishte një litar të varur. Menjëherë oficeri i rojës e ka prerë litarin me një biçak që e kishte me vete dhe e ulëm në tokë ku u munduam t’i jepnim ndihmën e parë. Oficeri i sallës operative Gëzim Caka njoftoi patrullën e cila erdhi dhe e mori për ta dërguar në spital, ku më pas ka mësuar se ka ndërruar jetë. Në lidhje me litarin ai nuk e di ta shpjegojë se ku e ka gjetur Ilvi Meta atë, punonjësi i policisë deklaron se ai person e ka kontrolluar konform procedurës standarde dhe për këtë mund të shihen edhe pamjet e kamerave të sigurisë në Komisarioatin e Policisë së Kavajës. Ai sqaron se si rregull, personi i shoqëruar në ambientet e policisë kontrollohet për sende të ndaluara dhe sende që mund t’i rrezikojnë jetën” – është shprehur polici Rushit Kola.
Discussion about this post