Ish-truproja i ish-ministrit të Brendshëm Saimir Tahiri, Hekuran Marku, do të dalë nesër para gjykatës së Posaçme Kundër Korrupsionit dhe Krimit të Organizuar (GJKKO). Mësohet se seanca pritet të nisë në orën 09:30. Prokuroria ka kërkuar ‘arrest me burg’ për Markun, masë që pritet t’i komunikohet nesër të ekstraduarit nga Gjermania.
Ish-truproja i ish-ministrit Tahiri është ekstraduar nga Gjermania drejt Shipëria më 1 prill të këtij viti, shtatë muaj pas arrestimit të tij. Marku akuzohet se në bashkëpunim me 4 italianë dhe një shqiptar të njohur si Eltjon Bregu ka trafikuar rreth 1 ton kanabis drejt Italisë bashkë me kolegun e tij Agustin Deda. Droga iu është sekuestruar dy të arrestuarve në Bari, Fiqiret Seferi dhe Ferhat Ajdini. SPAK dyshon se Deda dhe Marku se kultivuan drogë me Bregun dhe tentuan ta trafikonin për tua dorëzuar katër italianëve.
Ka qenë dëshmia e 4 të penduarve të drejtësisë që kanë pranuar të bashkëpunojnë me prokurorinë duke rrëfyer për trafikun e drogës nga Shqipëria drejt Italisë. Ata kanë dhënë informacione për 3 vite, pas të cilave SPAK, në bashkëpunim me Antimafian italiane, Eurojust dhe DIA, kanë arritur të dokumentojnë aktivitetin kriminal të 4 grupeve që trafikonin drogë nga Shqipëria drejt Italisë dhe Spanjës përmes operacionit “Shpirti”. Deda u prangos në Francë. Ky i fundit ka kërkuar azil politik, kërkesë që mund të shtyjë ekstradimin derisa shteti francez të shprehet për përfitimin e statusit të azilantit politik ose jo.
Discussion about this post