Ka më shumë se një muaj që qeveria Rama ka shkurtuar shpenzimet për shkak të krizës energjitike por bashkia e Tiranës nuk ka ndalur shpenzimet e fasadave por vazhdon të harxhojë fonde të cilat nuk lidhen me gjëra të domosdoshme por me lyerjen e shkollave.
Në 23 Mars Drejtoria e Përgjithshme e Objekteve Publike, institucion në varësi të bashkisë së Tiranës ka hapur thirrjen për tenderin me numër REF-22620-03-18-2022 me fond limit 400 milionë lekë të vjetra pa TVSH për mirëmbajtjen e objekteve të caktuar të cilat janë të specifikuara tek dokumentat e prokurimit.
Deri në momentin e shpalljes së fituesit, e dyshimtë ngelej vetëm lyerja e shkollave por përzgjedhja e fituesit shton dyshimet për procedura favorizuese pasi kërkimet e redaksisë zbuluan lidhje akoma më të thella sepse kompanitë “Eurondertimi 2000”, “Ndregjoni” dhe “Shëndelli” shpk janë skualifikuar nga gara për tenderin.
Konkretisht në 6 maj janë skualifikuar të treja kompanitë duke shpallur fituese ofertën me vlerë 383 milionë lekë të vjetra pa TVSH të kompanisë “Valona Konstruksion” shpk në pronësi të Besnik Lulaj, pronar i Marina Bay dhe ish-aksioner tek kompania “Remonti Elektrik” e Koço Kokëdhimës.
Te kontrata e marrëveshjes e cila parashikon që kompania “Valona” shpk ta kryejë këtë shërbim nga 1 qershori deri në 15 shtator përfshihet lyerja me bojë e ambienteve të brendshme dhe të jashtme të 35 shkollave. Por si shumë tendera është e vështirë të verifikosh se me çfarë lloj boje janë lyer pasi në kontratë specifikohet bojë e cilësisë së lartë por nuk përcaktohet se cila shkollë do lyhet, tek cila do përdoret suvaja por çdo gjë ngelet e mjegullt.
“Lyerja me boje hidroplastike importi do te behet per disa objekte shkollore ne fasaden e jashteme te ketyre institucioneve si dhe muret rrethuese te tyre”, shkruhet te dokumentat e tenderit, duke ngritur pikëpyetje për nivelin arsimor të administratës por duke lënë të paspecifikuar se ku do shkojnë këto materiale të shtrenjta dhe për më tepër, a do harxhohet boja vërtet?
Dyshimet e redaksisë bazohen tek faktet me tendera pa garë apo me skualifikime nga Erion Veliaj të cilat janë simptoma që i paraprijnë një administratë publike në degradim duke rrezikuar fondet publike.
Besnik Lulaj është pronari i “Marina Bay” dhe në vitin 2019 ka ndryshuar emrin e kompanisë “Valona Konstruksion” shpk duke e kthyer në “MARINA BAY LUXURY RESORT AND SPA” por brenda vitit e ka kthyer përsëri në “Valona Konstruksion” sipas të dhënave nga Qendra Kombëtare e Biznesit. Për më tepër në 7 mars kjo kompani ka fituar një tender pa garë, i klasifikuar me flamur të kuq nga Open Data Albania pasi paraqet rrezik të lartë për korrupsion, i cili ka vlerën 180 mijë euro pa TVSH për restaurimin e zyrave të Drejtorisë Rajonale të sigurimeve shoqërore në Durrës.
Kush del nga shtëpia herët në mëngjes për të shkuar në punë, e di se tek dyert e postës shqiptare e cila nuk është hapur akoma, çdo fillim muaji do shohësh radhën e gjatë të pensionistëve të cilët presin me padurim pensionin lëmoshë të kësaj qeverie.
Ky pushtet qendror por edhe bashkiak nuk ka fonde për të mbështetur këtë shtresë por ka fonde për të mbështetur financime për mure, betone dhe fasada ashtu si kryetari i bashkisë Tiranë. Pikëpyetja tjetër që ngrihet është se në 23 maj 2016, në media është denoncuar fakti se kompania “Remonti Elektrik” ka fituar tenderin me vlerë 1 milion euro nga OSHEE-ja pa garë dhe pa konkurrentë, e cila në atë kohë ka patur si aksioner kryesor Besnik Lulaj. Në vitin 2013, Lulaj ka blerë nga ish-deputeti i Partisë Socialiste Koço Kokëdhima një pjesë të aksioneve të kësaj kompanie, për t’i shumëfishuar dhe për t’ia rishitur ato aksionerit kryesor të saj zotit Kokëdhima në vitin 2018.
Discussion about this post