Grabitja e bankës në Koplik në Malësinë e Madhe ka “ngritur në këmbë” policinë. Pak më herët policia ka dalë me një njoftim zyrtar lidhur me arratisjen e grabitësve ku tregonte se grabitësit kanë djegur makinën e tyre tip “Volkswagen” dhe më pas nën kërcënimin e armës ndaj shoferit të një prej automjeteve që po kalonte në rrugë, kanë arritur të marrin një makinë tip “Benz” dhe janë larguar nga vendngjarja.
Shërbimet e Policisë janë vënë në ndjekje të autorëve duke u ndihmuar dhe nga shërbimet e Drejtorisë Vendore të Policisë Shkodër dhe grupe të FNSH Shkodër. Aktualisht janë angazhuar Forcat e Ndërhyrjes së Shpejtë, RENEA e një helikopter që po bëjnë krehjen e zonës si nga toka ashtu edhe nga ajri. Por, ende nuk ka asnjë gjurmë të autorëve.
Ndërkaq janë publikuar dhe pamjet që tregojnë makinën e djegur të autorëve, e cila është shkrumbuar.
Tre maskuarit u futën këtë mesditë në bankë dhe grabitën një sasi të konsiderueshme parash, vlera e të cilave nuk është zbardhur ende. Grupi hetimor, nën drejtimin e Prokurorisë pranë Gjykatës së Rrethit Gjyqësor Shkodër, po punon për zbardhjen e ngjarjes dhe sqarimin e plotë të rrethanave të saj.
Discussion about this post