Në futboll edhe pse arrin të marrësh rezultate, përsëri trajneri është gjithmonë në fije të perit. E tillë është edhe situata me Luciano Spallettin në krye të Napolit.
Edhe pse napolitanët janë të 3-të në renditje, pas Inter dhe Milan, në Napoli kërkojnë largimin e tij. E çuditshme në fakt, por është mëse e vërtetë!
Disa tifozë të skuadrës napolitane nuk kanë nguruar të shpalosin një pankartë në sheshin e stadiumit “Maradona”, ku i kujtojnë teknikut edhe makinën e vjedhur në tetor, ndërsa i bëjnë thirrje të largohet nga drejtimi i skuadrës.
“16 tetor 2021: Spalleti, do t’ua kthejmë Pandan, mjafton që të largohesh”, shkruhet në pankartën e tifozëve, që edhe të hënën, në 35 vjetorin e titullit të parë kampion, nuk u kursyen.
“10 maj 1987: 35 vite më parë, burra të tjerë, të tjera vlera. Nga m**i aktual ruajmë vetëm ngjyrat”, shkruanin ultrasit e Napolit.
E ardhmja e Spallettit mbetet për t’u diksutuar. De Laurentiis, pavarësisht ngacmimeve të ndryshme, e sheh atë në qendër të projektit edhe për sezonin e ardhshëm dhe vetë trajneri është treguar i gatshëm për të qëndruar. Tani duhet presim nëse kjo pankartë do të çojë në reflektime të reja, apo palët do të vazhdojnë sipas planit të tyre.
Discussion about this post