Kreu i grupit parlamentar të socialistëve, Taulant Balla ka treguar detaje për takimet që zhvilloi me Fatmir Mediun dhe Shpëtim Idrizin, ku një paralajmërim pati dhe për Partinë Demokratike.
Sipas Ballës, Fatmir Mediu ka marrë përsipër që të negociojë me të gjitha palët e opozitës, në mënyrë që të dilet me propozime konkrete nga ana e tyre për kandidatët për president. Por nga ana tjetër, ai i kujtoi opozitës se po mbaron afatin për propozimin e emrave, pasi të hënë mbahet raundi i parë për votimin e Presidentit të ri.
“Bashkë me kolegët Gjiknuri e Spiropali zhvilluam sot një raund të dytë takimesh me dy prej tre grupeve parlamentare të opozitës. Besoj sikur ju kanë komunikuar e kolegët e opozitës PS e ka dëshmuar dhe sot disponibilitetin për të kaluar në diskutime konkrete me emrat e kandidatëve. Me dy grupet parlamentare qe kemi takuar ka pasur gatishmëri për të hedhur në tavolinën e bisedimeve emra konkretë. Mediu na ka informuar dhe për një qasje për të ardhur me një emër apo disa emra konkretë nga opozita, për një përpjekje që Mediu po bën. Vijoj të shpresoj që nga ana e grupit të PD të ketë vendimmarrje për të ardhur edhe ata në tryezën e diskutimeve. Disponueshmëria jonë për ti dhënë Shqipërisë një president jo të PS do vijojë të jetë dhe në ditët në vijim por kjo ka disa afate. Në rast se deri tani kishim mundësi ti shtynim afatet tani s’kemi më asnjë mundësi në 16 maj është raundi i parë. Afati i fundit i raundit të dytë është 23 maj”, tha Balla.
Discussion about this post