Ish-kryeministri Sali Berisha ka akuzuar ditën e sotme kryeministrin Edi Rama se me anë të Ballkanit të Hapur, ka futur në sherr Shqipërinë dhe Kosovën. Gjatë një takimi elektoral me demokratët në Vlorë, Berisha shprehet se në vend që të ndiqte procesin e Berlinit, Rama na lidhi me Serbinë.
Sipas ish-kryeministrit, Ballkani i Hapur ka synim që të shkatërrojë prodhimin bujqësor të Shqipërisë.
“Sot kombi është i lirë. Por sot në Shqipëri, ne kemi një regjim i cili shkelmon me politikat që ndjek, interes më jetike kombëtare të shqiptarëve. Ka një përputhje, deri diku dhe një bashkëpunim midis albanofobisë dhe qarqeve albanofobike në rajon dhe botë, me qeverinë shqiptare. Mund të japim me dhjetëra shembuj. Nuk po ndalem këtu në një skemë armik i jashtëm apo i brendshëm. Ne si komb kemi interesat tona kombëtare. Të gjitha kombet kanë kundërshtarët e tyre, por kombet zhvillohen kur kanë një shtet patriotik, kur shteti bëhet gardian i interesave të tij. Dhe qytetarët i dëshmojnë dashurinë e tyre atdheut.”
Nga ana tjetër, në fjalën e tij Berisha shprehet se me procesin e Berlinit, fuqitë europiane kërkojnë që të mbajnë të lidhur në procesin e integrimit europian, dhe gjithashtu sipas tij të japin shpresë dhe projekte të reja.
“Të marrim Ballkanin e Hapur dhe Procesin e Berlinit. Me procesin e Berlinit, fuqitë europiane kërkojnë të na mbajnë të lidhur në procesin e integrimit europian, të na japin shpresë dhe projekte. Nga lindi ballkani i hapur. Ballkani i Hapur lindi nga Beogradi, sepse Beogradi nuk do të ndjekë procesin e integrimit europian. Pse nuk është i gatshëm? Sepse ka një President që është doktrinal për genocidin në Bosnje. Atij duhet të njohë genocidin.”
Së fundmi, Berisha e ka mbyllur fjalimin e tij duke thënë se sipas tij Rama nxit sherr mes Tiranës dhe Prishtinës.
“Ky zotëria, shkon na lidh me të. Krijon një aleancë në kurriz të Prishtinës. Çfarë interesi është ky? Ky fut sherr mes Tiranës dhe Prishtinës. Ky projekt ka synim shkatërrimin e prodhimit shqiptar, pasi nuk konkurrojmë dot me një bujqësi që ka marrë më 20 herë më shumë subvencione se fermerët shqiptarë. Procesi europian e parashikon shkëmbimin me kuota që i ke të garantuara për prodhim dhe eksport, ndërsa ky na thotë tregti e lirë”.
Discussion about this post