Ministri i Jashtëm grek sot vizitë zyrtare në Shqipëri, zbardhet agjenda

Ministri i Jashtëm grek Nikos Dendias do të vizitojë Shqipërinë ditën e sotme.

Dendias pritet të takohet me homologen Olta Xhaçkën dhe më pas në orën 12.00 pritet të kenë një konferencë të përbashkët për mediat.

Ai do të ketë një takim edhe me kryeministrin Edi Rama. Dendias do të zhvillojë një takim edhe me anëtarët e pakicës kombëtare greke nga Himara dhe më pas me Kryepeshkopin e Tiranës, Durrësit dhe të gjithë Shqipërisë, Anastas Janullatos.

Bisedimet do të fokusohen në çështje me interes dypalësh, evropian dhe rajonal, me theks në rrjedhën e marrëdhënieve greko-shqiptare në të gjitha fushat, përgatitjet për Samitin e Procesit të Bashkëpunimit të Evropës Juglindore (SEECP), zhvillimet në Ukrainë pas pushtimit rus, në rajonin e Mesdheut Lindor dhe në perspektivën evropiane të Ballkanit Perëndimor.