Agjencia Kombëtare e Bregdetit, e drejtuar nga Ledion Lako, i atakuar vitet e fundit për lejet e përdorimit të plazheve, ka shpallur fituesin e tenderit 1 milionë dollarë për pastrimin e resorteve të oligarkëve. Sipas dokumenteve që disponon portali Boldnews.al, fituesi i këtij tenderi është firma “Fusha”, një kompani e njohur, e cila ka pasur një “bashkëpunim” me Lali Erin, apo së fundmi po fiton me shumicë tendera në Jug të Shqipërisë, atje ku po ndërtojnë oligarkët më të mëdhenj të Shqipërisë.
Para pak ditësh, redaksia jonë publikoi investigimin sesi qeveria kishte marrë “fshesën” dhe do të pastronte rezidencat private të njerëzve më të pasur të Shqipërisë. Do të pastroheshin fshatrat turistikë, banorët e së cilës kanë para me thasë dhe fare mirë mund të paguajnë firma private me paratë e tyre që t’i pastrojnë. Por, ashtu si “grabitën” trojet në bregdet, këta oligarkë po marrin edhe qindarkat e fundit nga taksat e shqiptarëve, të cilat po shkojnë vetëm te një grup i vogël njerëzish.
Sipas dokumenteve, Agjencia Kombëtare e Bregdetit finalizoi tenderin e hapur, mbi kufirin e lartë monetar, me objekt “shërbim pastrimi i zonës bregdetare, për Bashkitë Durrës, Sarandë, Kavajë, Himarë”. “Me anë të këtij njoftimi ju informojmë se, në këtë procedurë kanë marrë pjesë “FUSHA” me ofertë në vlerën 86.411.340 lekë pa TVSH. Gjithashtu, edhe kompania “ALKO-IMPEX GENERAL CONSTRUCION” me ofertë në vlerën 89.792.100 lekë, pa TVSH” thuhet në këto dokumente. Pra, dy kompani të lidhura ngushtë me pushtetin, ku e para me Lali Erin dhe e dyta me ish-deputetin e PS-së, Sadri Abazi. Por, në këtë procedurë fitoi kompania e preferuar e Veliajt, ndërsa kompania e Abazëve u s’kualifikua me arsyetimin se s’kishte dorëzuar sigurimin e ofertës. Madje, nuk ka dëshmuar të ketë shërbime të ngjashme të realizuara gjatë tre viteve të fundit./Boldnews.al/
Discussion about this post