Shoqata e Shoqërive të Hidrokarbureve i është përgjigjur pyetjes së deputetit socialist Erion Braçe se kompanitë e tregtimit të karburanteve në vend nuk pasqyrojnë ecurinë e çmimeve në bursa. Në një reagim për mediat shoqata shkruan se ecuria e çmimit të fuçisë së naftës në bursa nuk mund të përdoret si referencë me çmimin e shitjes së karburantit në pikat që tregtojnë me pakicë.
“Fuçia është tregues i naftës së papërpunuar dhe kjo po bie pasi rafineritë nuk po e kërkojnë, sepse me këto çmime ato dalin me humbje. Nafta për transport, pra për makina, ndryshe nga ajo në fuçi, në treg varet nga kuotimi, që i behet çdo ditë çmimit në publikimin e çmimeve PLATT’S dhe bëhet në USD për ton. Ky çmim po rritet pavarësisht se nafta e pa përpunuar ka pësuar pak rënie, kjo se duke u ulur kërkesa për naftë të pa përpunuar rafineritë po krijojnë mungesë në treg të naftës për transport (makina)”.
Shoqata thotë se Bordi i transparencës, që u krijua në fillim të marsit dhe cakton periodikisht çmimet e tregtimit me shumicë e pakicë të karburanteve e gazit, nuk po i favorizon aspak kompanitë.
“Kushdo mund të verifikojë nga bilancet e kompanive se mesatarisht 5 lekë për litër shpenzime operative nuk u lejohet kompanive t’i përfshijnë në çmimin e tabelës”.
Discussion about this post