Rreth 12 milionë euro është vlera e pasurive që shteti ka konfiskuar nga qytetarët e Kosovës. Përveç veturave, Agjencia e Administrimit të kësaj pasurie menaxhon edhe pasuri të paluajtshme, e shumë gjëra të tjera me vlerë.
Rreth 12 milionë euro është vlera e gjithçkaje që është aktualisht e sekuestruar apo konfiskuar nga organet ligjzbatuese në Kosovë. Shumica dërrmuese prej tyre janë nën masë sekuestrimi, pasi dyshohet se janë përfituar kundërligjshëm. Vlera e saktë nuk dihet ende, por zyrtarët e këtyre pasurive thonë se janë në fazë të vlerësimit.
Disa nga pasuritë e luajtshme ruhen në periferi të Prishtinës. Këto vetura të sekuestruara nga shteti ose janë përdorur për kryerje të veprës penale ose janë përfitim nga vepra penale, e vlera e tyre aktualisht arrin në 2,377,000.00 euro.
E brenda depos ka disa dhoma në të cilat gjenden mjete motorike, që ishin gjithashtu, në pronësi të qytetarëve të Kosovës. Në një tjetër dhomë janë televizorët të sekuestruar, e aparate kazinosh, të cilët Policia e Kosovës i ka marrë nga hapësirat e lojërave të fatit, kur ato u ndaluan në Kosovë.
E një tjetër hapësirë është e mbushur me kompjutera, që dikur ishin në lokalet ku ushtrohej puna në bizneset call center, përpara se në to të zhvillohej një operacion i gjerë i Policisë së Kosovës dhe autoriteteve gjermane.
Por, diçka edhe më interesante gjendet në këto dhoma, bëhet fjalë për laboratorët e drogave që në Kosovë, së fundmi janë zbuluar e shkatërruar nga Policia në masë të madhe.
Discussion about this post