Presidenti Ilir Meta ka reaguar për zjarrin që ka përfshirë ishullin e Sazanit. Përmes një postimi në Facebook, Meta shkruan se po e ndjek me vëmendje situatën ndërsa kërkon angazhimin e plotë të strukturave qëndrore dhe vendore për shuarjen sa më të shpejtë të flakëve.
Meta, ndalet tek parashikimi i Institutit të Gjeoshkencës për verën, ndërsa thekson se gjatë temperaturave të larta duhet të angazhohet flota ajrorje për ndërhyrjen nga ajri për fikjen e vatrave të zjarrit në zonat me terren të vështirë. Kreu i Shtetit bën thirrje që të mos përsëritet situata e vitit të kaluar.
“Po ndjek me vëmendje situatën e përhapjes së zjarreve në zonën e Vlorës, veçanërisht në Ishullin e Sazanit.
Me qëllim parandalimin e përhapjes së vatrave të zjarrit, që të mos përsëritet situata si në verën e kaluar, kërkoj angazhimin e plotë të strukturave vendore dhe qendrore për lokalizimin dhe fikjen e tyre në kohë sa më të shkurtër.
Duke vlerësuar parashikimet e Institutit të Gjeoshkencës për një verë të nxehtë, me temperatura shumë të larta, bëj thirrje për vënien në gadishmëri të strukturave të Ministrisë së Mbrojtjes, Ministrisë së Brendshme dhe Bashkive në të gjithë Shqipërinë, për mbrojten civile, sidomos për angazhimin e flotës ajrore, për ndërhyrjen nga ajri për fikjen e vatrave të zjarrit në zona ku është e pamundur ndërhyrja në rrugë tokësore, siç është rasti i Ishullit të Sazanit.
Njëherazi i nxis strukturat e pushtetit vendor për shtimin e vrojtuesve për të informuar në kohë dhe mbajtjen në gadishmëri të strukturave operacionale, për ndërhyrje të menjëhershme në përballimin e situatave të zjarrit gjatë muajve të verës.
I ftoj të gjithë qytetarët për të kontribuar me informacione të shpejta në të gjithë territorin e vendit për çdo rast zjarri të konstatuar, në mënyrë që strukturat përgjegjëse të angazhohen në kohën e duhur për izolimin dhe shuarjen e tyre.”-shkruan Meta.
Discussion about this post