Kryebashkiaku i Vorës, Blerim Shera, me sa duket akoma nuk është i vetëdijshëm se cilën njësi vendore drejton. Të paktën këtë përshtypje të jep në rrëmujën që ka bërë me tenderin e radhës. Me datë 20 maj, Shera ka hapur garën për një tender me numër reference REF-27946-05-09-2022 dhe me objekt “blerje karburanti për nevojat e Bashkisë Vorë”.
Për këtë tender janë shpenzuar jo pak, por 50 milionë lekë vetëm për 6 muajt e mbetur të vitit. Përveç vlerës së lartë të tenderit për blerje nafte në kohën kur vendi është në krizë dhe çmimet janë në qiell, në këtë tender bien në sy gabimet e shumta që ka. Të dhënat e tenderit janë hedhur gabim, pasi ky tender është hapur nga Bashkia Vorë dhe shërbimi do të shkojë për të, të paktën kështu përcaktohet në dokumentin e hapjes së garës dhe shpalljes së fituesit. Por në të dhënat e përgjithshme të tenderit, ku është shpallur fituesi me 1 qershor, ka një gabim, pasi institucioni prokurues dhe ai që do përfitojë shërbimin regjistrohet bashkia Vorë, por autoriteti kontraktor regjistrohet Bashkia Vlorë.
Tashmë nuk e dimë nëse Shera është ngatërruar nga nxitimi për të shpërdoruar këto 50 milionë lekë, apo Dritan Leli i Bashkisë Vlorë ka filluar punë edhe në bashkinë Vorë. Gjithsesi, ligji për prokurimet thotë se në raste gabime tenderi nuk duhet të mbyllet, por duhet të rishikohet dhe më pas të shpallet fituesi.
Kastrati fiton pa garë
Problemet me dokumentin janë vetëm fillimi i kësaj aferë, pasi ajka ndodhet në dokumentin ku është shpallur fituesi. Sipas të dhënave të publikuara garën për këtë tender e ka fituar Kastrati, më saktë kjo kontratë i është falur Shefqet Kastratit, pasi nuk është zhvilluar një garë.
Për këtë tender ka paraqitur ofertë vetëm kompania Kastrati. Ligji kërkon që kur për një projekt nuk ofrohen më shumë se 2 kompani atëherë gara pezullohet. Por, sikur jemi mësuar tashmë kur bëhet fjala për Kastratin, çdo bashki e shkel hapur ligjin. Kështu ai ka futur 50 milionë lekë në xhep pa u lodhur fare. Madje, aq në nxitim është bërë ky tender sa bashkia nuk ka marrë parasysh që Shefqet Kastrati ka bërë një ofertë të shtrenjtë, 100% sa vlera e fondit limit. Kështu Bashkia Vorë ka shkelur edhe një tjetër pikë të rregullores për prokurimet, por as që e ka vrarë mendjen, Shera ka firmosur dokumentin dhe Kastrati ka mbushur xhepat.
Këto të dhëna vetëtijnë edhe njëherë problematikën që Gijotina.com ka ngritur më parë për monopolin që Kastrati ka krijuar në tregun e karburanteve, duke përpirë pa garë çdo projekt të institucioneve shtetërore dhe private, kur bëhet fjala për furnizimin me naftë.
Discussion about this post