Detaje të reja janë publikuar rreth ngjarjes së rëndë që tronditi ditën e djeshme Tiranën, ku i riu Aleksandër Sadikaj humbi jetën pasi i bënë atentat me tritol në makinë në rrugën Sauk-TEG. Mësohet se rreth 400 gram tritol, e mbështjelle me natriban dhe e futur në një kuti të zezë, ishte vendosur në makinën tip “Volsvagen” të 27-vjeçarit, shpërthimi i të cilit mori jetën të riut.
Ndryshe nga herë të tjera kur tritoli është përdorur për mesazhe ndaj personave të caktuar, këtë herë autorët kishin si synim eleminimin e objektivit. Hetuesit kanë dalë në këtë përfundim, pasi sasia e tritolit ishte vënë në pjesën e përparme të mjetit nga krahu i shoferit, çka shton dyshimet e hetuesve që autorët e vendosjes së tij donin të ‘hiqnin qafe’ drejtuesin e mjetit.
Ndërkohë burime bëjnë me dije se në makinën që u hodh në erë, ekspertët gjetën edhe një armë zjarri, të llojit pistoletë. Në komisariat për tu marrë në pyetje, në komisariat janë shoqëruar, disa familjarë, të afërm e miq të viktimës. Ata janë pyetur lidhur me identifikimin e personave që i riu mund të ketë pasur konflikte.
Me ndihmën e tyre, dhe me informacionet që ata kanë pasur hetuesit janë munduar të kenë edhe një ide, mbi lëvizjet viktimës ditët e fundit, me qëllim hedhjen dritë mbi momentin e vënies së tritolit, nga autorët. Për zbardhjen e ngjarjes, hetuesit i kanë përqendruar hetimet në dy drejtime, ku njëra pistë është hakmarrja, për shkak të të shkuarës së tij kriminale dhe pista tjetër, trafiku i drogës.
Kjo e fundit, është pista më e mundshme, pasi për të riun blutë kanë pasur të dhëna dhe informacione që i kanë marrë në rrugë operative, se 27-vjeçari ka qenë anëtar i një grupi të fuqishëm kriminal, që merret me kultivim të lëndëve narkotike në jug të Shqipërisë, dhe trafikimin e saj drejt Greqisë.
Ndërkohë mjeti që u hodh në erë nuk ka qenë në pronësi të viktimës, por përdorej shpesh prej tij, për këtë shkak në pyetje është marrë edhe pronari i mjetit, ku po hetohet nëse mund të ketë qenë edhe ai shënjestra.
Hetuesit deri më tani, përveç kamerave të sigurisë të një biznesi që ndodhet pranë zonës ku u shpërthye mjeti, kanë sekuestruar edhe kamera sigurie në vendet ku i riu ka frekuentuar të premten dhe mëngjesin e së shtunës. Aleksandër Sadikaj jetonte mes Tiranës dhe Memaliajt, ai ishte pronar i një resorti në vendin e tij të lindjes, ndërkohë që edhe në kryeqytet administronte një lokal në zonën e Selitës.
Discussion about this post