Vijojnë hetimet për identifikimin dhe kapjen e autorëve për vrasjen me tritol të Aleksandër Sadikaj disa ditë më parë në aksin Sauk-TEG në Tiranë. Hetuesit kanë marrë dëshmitë e familjarëve për të zbërthyer lidhjet dhe njohjet e viktimës me persona të tjerë të cilët dyshohet se mund të kenë marrë pjesë në atentat. Motra e 27- vjeçarit ka deklaruar para grupeve hetimore se vëllai i saj jepte shuma të vogla parash, fajde miqve dhe shokëve të tij, ndërsa pretendon se vrasja nuk është kryer për këtë arsye. Sakaq ajo ka zbuluar se Sadikaj kishte edhe një jelek anti-plumb që sipas motrës, jelekun ia kishte bërë dhuratë një mik i 27- vjeçarit.
“Dylbitë janë në shitje në faqe online, i përdorte për të parë zogjtë nga larg. Vëllai im nuk njeh njëri nga Holanda. Nuk ka shkuar kurrë dhe nuk ka asnjë shok atje. Lekët me fajde? E vërtetë! Janë dhënë shuma të vogla tek miqtë dhe shokët. Nuk të vret njëri për shuma kaq të vogla. Jelekun anti-plumb ia bëri dhuratë një shok”, tregon motra e të riut.
Si ndodhi ngjarja?
Aleksandër Sadikaj ishte nisur drejt Memaliaj, por në aksin Sauk-TEG, makina me targa AB077PO me të cilën ai po lëvizte shpërtheu, si rrjedhojë e sasisë së tritolit. Autorët janë treguar të kujdesshëm, kjo pasi kanë vendosur që të bëjnë shpërthimin e komanduar në një moment kur nuk ka pasur në rrugë asnjë makinë tjetër përreth Sadikajt, duke shmangur rrezikun që nga ai shpërthim të vritej një person i pafajshëm. Bomba me celulare dyshohet se i është vendosur nga persona që kishin akses te makina. Nga shpërthimi Sadikaj ka humbur 2 gjymtyrët e poshtëm, këmbët, dhe ia ka dalë që të dilte vetë nga makina. Ai është ndihmuar edhe nga kalimtarët, teksa është dërguar me urgjencë në spital, por për fat të keq nuk ia ka dalë që t’i mbijetonte plagëve të marra, për rrjedhojë humbi jetën.
Kush është Aleksandër Sadikaj?
27-vjeçari Aleksandër Sadikaj është një njeri me precedent të theksuar kriminal në fushën e vjedhjes, krimeve ndaj personit dhe narkotikëve. Ai rezulton pronar i një resorti me pistë hipizmi, i njohur si “Sancho Farm Albania” në Memaliaj, vendi i origjinës së nënës. 3 vite më parë, në korrik të 2019, ishte i përfshirë në një tjetër ngjarje kriminale ku ka tentuar që të vrasë me thikë 40-vjeçarin nga Vlora Berti Tahiraj, pranë Kanalit të Cukës në Sarandë. Ndërkohë, rezultonte si autor i disa vjedhjeve apo kundërshtimeve të urdhrave të policisë. Përveç akuzave të tjera ndër vite, para 5-6 vitesh ai dyshohet se ka kryer një vrasje në Athinë për prishje pazaresh të drogës.
Discussion about this post