Në një kohë që kryeministri Edi Rama po zhvillon një vizitë zyrtare në Ukrainë, ish-deputeti demokrat, Genc Pollo ka analizuar deklaratat e kreut të qeverisë shqiptare për presidentin e Serbisë, Aleksandër Vuçiç. Ish-deputeti shkruan se Rama ndryshe nga të gjithë liderët e Evropës justifikon refuzimin e sanksioneve ndaj Rusisë nga Vuçiç.
Ish-deputeti Pollo shkruan se Rama përpiqet ta mbrojë me sofizma Vuçiç.
“Edi Rama në intervistë me politico.eu justifikon refuzimin e sanksioneve europiane ndaj Rusisë së Putinit nga ana e presidentit serb Vuçiç.
Me këto argumente:
1-“Serbia është ndryshe nga të tjerët sepse ka lidhje historike e speciale me Rusinë”
Ky është një pohim i rremë pasi shumë shtete sllave në Ballkan si p. sh. Bullgaria ka lidhje historike e speciale me Rusinë. Edhe për Malin e Zi mund të thuhet deri diku kjo gjë. Por edhe në Europën Qendrore ka shtete sllave me një histori përgjithësisht miqësore me rusët. Megjithatë të tëra këto shtete kanë adoptuar sanksionet e Brukselit ndaj Serbisë. Vetëm dy janë përjashtimet: Bjellorusia e Lukashenkos dhe Serbia e Vuçiçit. Rama thotë të pavërteta (mendoj se është i ndërgjegjshëm për këtë) për të legjitimuar pozicionin e Vuçiçit.
2- “Adoptimi i sanksioneve (të plota) nga Serbia është praktikisht i pamundur… Është vetëvrasës për ekonominë serbe”
Ky është tipikisht argumenti i “njeriut të kashtës” (straë man) kur ndryshohet arbitrarisht objekti i çështjes për të dalë në një konkluzion të volitshëm.
Sanksionet e BE nuk janë të tilla që asfiksojnë ekonominë; Shtetet në BE vazhdojnë të blejnë gaz nga Rusia; naftën e mbyllin në fund të v. 2022 e kanë bërë përjashtime nga sanksionet për shtete me vartësi të theksuar nga hidrokarburet ruse si Sllovakia, Hungaria etj. Por ka një sërë sanksionesh ekonimikisht të përballueshme që përbëjnë 97% të listës së Brukselit. Për këtë duhet vullnet e vizion politik. Vuçiçi e ka bërë të qartë pozicionin e tij; madje disa herë. Rama përpiqet t’a mbrojë me sofizma.
3- “Nganjëherë duhet t’a durojmë tjetrin. T’a kuptojmë atë. Ndryshe nuk e ruajmë bashkësinë tonë për synime të larta. … Serbia është në rrugën e duhur vetëm se duhet të ecë më shpejt”
Këtu Rama nuk mashtron. Nëse synimi është një regjim korruptokratik ai është në elementin e vet. Dhe të Vuçiçit
4- “Presioni i tepruar i Perëndimit ndaj Serbisë është shkatërrues për stabilitetin e Ballkanit Perëndimor”
Kjo po që është risi e surprizë! Se deri dje konsensusi, përfshi edhe kampin Rama retorikisht, ishte se burim destabilizimi ishte Serbia me qendrimin e saj ndaj Bosnjës e Kosovës si dhe me lidhjet e saja me fuqitë jo miqësore ndaj Europës. Mbas agresionit të Putinit ndaj Ukrainës ky konsensus u konsolidua dhe thirrjet ndaj Vuçiç-it për ndryshim kursi u shtuan. I fundit ishte para ca ditesh kancelari gjerman në Beograd. Kjo dalje nga rreshti e Ramës është vërtet për t’u parë.
Deri në serinë e ardhëshme.
To be continued.
Genc Pollo”-shkruan Pollo.
Discussion about this post