I dërguari Special i BE-së për dialogun, Miroslav Lajçak është shprehur me tone shumë të ashpra sa i përket liberalizimit të vizave për Kosovën.
Hulumtuesi në Forumin Ballkanik, Samir Behariç ka rrëfyer për momentin kur ai pyeti Lajçakun se pse liderët e Ballkanit duhet t’i besojnë BE-së, duke ditur faktin se pavarësisht premtimeve, Kosovës nuk i janë liberalizuar vizat.
Ndërkohë, përgjigja e Lajçak ishte jashtë kornizave të argumentimit.
“Nëse nuk i besoni BE-së, shkoni diku tjetër”, i është kthyer Lajçak, sipas Behariç.
Sipas pretendimeve të hulumtuesit në fjalë, Lajçak ka thënë se është “trend” të kritikohet BE-ja për vizat, por që sipas tij liderët e Kosovës duhet të shkojnë tek vendet që po e bllokojnë procesin dhe të shohin se si mund të ia arrijnë qëllimit.
“Tash është bërë trend të kritikohet BE-ja për liberalizimin e vizave, por liderët e Kosovës duhet të shkojnë në shtetet që po bllokojnë lëvizjen që të pajtohen”, ka vazhduar Lajcaku, ndërsa ka pranuar se Kosova ka përmbushur të gjitha kriteret e nevojshme, sipas Behariç.
Të gjitha këto zhvillime, sipas Behariç kanë ndodhur në Forumin e Bratisllavës.
