Ish-kryeministri Sali Berisha u ka bërë thirrje qytetarëve të marrin pjesë në protestën e 7 korrikut, ku një ftesë të veçantë e pati dhe për emigrantët.
Nga foltorja e Kuvendit, Berisha lexoi të dhënat e Eurostat që i rendisin çmimet në Shqipëri më lartë se mesatarja e BE dhe shtoi se vetëm protesta është përgjigja e merituar ndaj regjimit.
“Jam sot këtu në këtë platformë për t’ju bërë thirrje. Të dashur qytetarë dhe qytetare, punonjës të administratës, me ndihmë ekonomike, të bashkohemi në protestën e 7 korrikut pasi bordet shushunja të Edi Ramës po rrisnin në mënyrë antiligjore çmimet për llogari të qeverisë. Po ju informoj të dhënat e fundit të Eurostat se në këtë vend ku qytetarët marrin 6 herë më pak se në BE, qumështi, veza, djathi kushton 105% të çmimit të vendeve të BE. Një çmim më të lartë se në mesataren e BE. Ato që ushqejnë kotelet me biftek, apo konet me mjaltë neozelandez nuk mund t’ua dinë qytetarëve shqiptare. Unë jam këtu për t’ju bërë thirrje dhjetëra mijëra bizneseve të vogla dhe të mesme, dhjetëra mijëra profesionistëve të lirë ekzistenca e të cilëve rrezikohet nga taksat e reja, që po i shton Rama dhe përgatitet t’i shtojë çdo ditë. Bashkohuni me ne se ky zotëri ka qëllim vetëm falimentimin dhe largimin tuaj nga Shqipëria në zbatim të platformës së spastrimit. U bëj thirrje emigrantëve të bashkohen në protestë për të mbrojtur të drejtat e tyre kushtetuese. Çdo emigrant duhet të ketë të drejtë të votojë për deputetin dhe partinë që ai dëshiron. Një thirrje të veçantë kam për pronarët për të cilët bëj autokritikë, u bëj thirrje të bashkohen me ne se pronat e tyre janë më të kërcënuara se kurrë ”, tha Berisha.
Discussion about this post