Kryeministri Edi Rama ka bërë me dije se në Samitin ku mori pjesë në Madrid ka kërkuar që Kosova të bëhet pjesë e mekanizimit të Partneritetit për Paqe, në NATO. Në një postim në rrjetet sociale, Rama shkruan se vendet që nuk e njohin ende si shtet duhet të marrin parasysh që Kosova ka mbajtur të njëjtin qëndrim si Bashkimi Evropian kundër agresionit rus, referuar luftës në Ukrainë. Rama shton gjithashtu se ka vlerësuar edhe lëvizjen e Presidentit të Turqisë, Recep Tayip Erdogan, i cili dha OK-n për Suedinë e Finlandën.
“SOT në NATO: Kërkova që Kosova të ftohet menjëherë në mekanizmin e Partneritetit për Paqe. Vendet që nuk e njohin ende Kosovën duhet të vlerësojnë qëndrimin e saj krejt të njehsuar me BE-në ndaj agresionit rus mbi Ukrainën-pavarësisht se Ukraina nuk e ka njohur ende Kosovën. Vlerësova marrëveshjen e arritur mes Suedisë, Finlandës dhe Turqisë, duke çmuar qasjen e drejtëpërdrejtë të Presidentit Erdogan në funksion të një shqetësimi shumë serioz të shtetit turk dhe nënvizuar se kjo marrëveshje është një shembull për zgjidhjet e problemeve mes aleatësh. Dëgjova nga Presindenti Joe Biden fjalët më të mira për Shqipërinë dhe rolin e saj në Këshillin e Sigurimit e në NATO, si edhe shprehjen e dëshirës së tij për të organizuar diçka bashkarisht me rastin e 100 vjetorit të vendosjes së marrëdhënieve diplomatike të Shqipëri-SHBA,”- shkruan Rama.
SOT në NATO: Kërkova që Kosova të ftohet menjëherë në mekanizmin e Partneritetit për Paqe?Vendet që nuk e njohin ende Kosovën duhet të vlerësojnë qëndrimin e saj krejt të njehsuar me BE-në ndaj agresionit rus mbi Ukrainën – pavarësisht se Ukraina nuk e ka njohur ende Kosovën? pic.twitter.com/HzRYyxVjCd
— Edi Rama (@ediramaal) June 29, 2022
Partneriteti për Paqe është program i bashkëpunimit praktik dypalësh ndërmjet shteteve partnere euroatlantike dhe NATO-s. Ky program, që është krijuar më 1994, u lejon shteteve që të zgjedhin vetë prioritetet për bashkëpunim.
Krerët e shteteve dhe qeverive të NATO-s u mblodhën në Madrid një Samit dyditor ku ditën e djeshme u arrit një marrëveshje me të cilën Turqia dha ‘OK’ për anëtarësimin e Finlandës dhe Suedisë në aleancë. Ndërkohë ditën e sotme u miratua Koncepti I ri Strategjik për Aleancën, duke përcaktuar prioritetet, detyrat kryesore dhe qasjet e Aleancës për dekadën e ardhshme. Dokumenti e përcakton Rusinë si “kërcënimin më të rëndësishëm dhe të drejtpërdrejtë” për sigurinë e aleatëve, ndërsa trajton Kinën për herë të parë dhe sfidat që Pekini paraqet ndaj sigurisë, interesave dhe vlerave të aleatëve.
Discussion about this post