Kreu i Grupit Parlamentar të PD, Enkelejd Alibeaj, ka kujtuar sot përmes një postimi në Facebook 2 korrikun, nisjen e eskodit të madh të shqiptarëve. Ai ka publikuar foton ku duken të rinjtë e revoltuar që thyen murin e ambasadave dhe hyn brenda në kundërshtim të regjimit komunist. Përmes këtij postimi Alibeaj shkruan se 2 korriku ishte goditja më e rëndë që mori regjimi komunist. Sakaq, ai iu ka bërë thirrje shqiptarëve që të ngrihen sërish me të njëjtën revoltë për të shembur muret që janë ndërtuar dhe po bllokojnë të ardhmen në vend.
“Me 2 korrik 1990 djem dhe vajza kurajozë, thyen barrierën e fundit të diktaturës komuniste. Kështu i dhanë shpresë shqiptarëve se e ardhmja ishte matanë atij muri hermetik. 2 korriku nuk ishte vetëm largimi drejt ëndrrës por ishte dhe goditja më e rëndë që mori regjimi komunist.
Shqiptarët kishin dhe kanë një ëndërr: Shqipërinë si Europa! Një ëndërr që sot, 32 vite pas rënies së atij muri, mbetet e parealizuar plotësisht. Sepse dhe pas 32 vitesh jemi në betejë me të keqen, me atavizmat e së shkuarës që kanë ngritur muret e reja që po i mbajnë shqiptarët ende larg perëndimit.
Ndaj sot, të gjithë sëbashku, duhet të shohim dritën e shpresës dhe të përpiqemi të rrëzojmë muret e reja. E bashkë me to dhe mbeturinat e mureve të vjetra. Për realizuar ëndrrën e përbashkët të shqiptarëve. Shqipërinë si Europa”, shkruan Alibeaj. Sipas tij e vetmja zgjidhje që shqiptarët të fitojnë sërish lirin është largimi i qeverisë që po na mban në një regjim oligarkësh.
Discussion about this post