Kryeministri i Shqipërisë Edi Rama dhe ai i Holandës, Mark Rutte, teksa janë pyetur nga gazetarët se duke parë rrezikun rus, a mundet që BE të bëjë me vendet e Ballkanit të njëjtën gjë që bëri NATO me Finlandën dhe Suedinë, kryeministri holandez tha se këto janë dy gjëra krejt të kundërta.
I të njëjtit mendim u shpreh edhe Rama i cili theksoi se Suedia dhe Finlanda do i japin shumë NATO-s, ndërsa Shqipëria dhe vendet e tjera që duan të aderojnë në BE më parë duhet të tregojnë veten.
Po ashtu gjatë konferencës Rama i ka bërë thirrje Maqedonisë së Veriut, që të pranojë propozimin francez, se në të kundërtën asnjë nuk do dojë të merret me ta.
“Suedia dhe Finlanda janë një ndihmë shumë e vlefshme për NATO-n, jo vetëm që të jenë anëtarë të rinj, por anëtarë ekselencë. Integrimi i plotë në BE nuk është e njëjta gjë, pasi kjo kërkon të nxitë vende si ne, ti bëjë ato të rriten më pas ti bëjnë pjesë të tyre. Sa i takon asaj që i përket Maqedonisë së Veriut, dua të përfitoj nga ky rast se Macron, Michel dhe Marku kanë punuar 48 orë për të arritur një propozim final që trajtonte shqetësimet që kishte RMV. Propozimi përfundimtar është një propozim i ri i presidentit francez, Charle Michel dhe po ashtu e Markut që i dha një shtysë. Do të ishte në fakt për tu ardhur keq, nëse kjo do të haste pengesa. Besoj se parlamenti duhet ta bëjë këtë gjë, se nëse jo do të duhet shumë vite pritje. Sa i përket Shqipërisë në Këshillin e Sigurisë jemi shumë krenarë që jemi atje. Ndihemi të përulur shumë për fjalët e mira që dëgjojmë për misionin tonë, nuk kemi asnjë dyshim për qëndrimin tonë, jemi në përputhje me atë që vendoset në nivelin e BE-së. E kemi të lehtë të jemi aty së bashku me SHBA-të dhe si europian krenarë”, është shprehur Rama.
Discussion about this post