Boris Johnsonit i kanë gjetur një punë të re pas dorëheqjes nga posti i kreut të qeverisë britanike. Qytetarët e Kievit i bëjnë thirrje 58-vjeçarit që të punojë si kryeministër i Ukrainës.
Shumë mund ta urrejnë në Mbretërinë e Bashkuar, por banorët e Kievit janë gati ta punësojnë kryeministrin në detyrë Boris Johnsonin. Ndërsa shprehin pakënaqësinë e tyre me dorëheqjen e konservatorit nga lidershipi i partisë dhe rrjedhimisht nga kreu i qeverisë, kryeqytetasit e ftojnë ish-kryeministrin të udhëheqë qeverinë ukrainase.
” Le ta ftojmë atë të jetë kryeministri ynë. Unë mendoj se popullariteti i tij këtu është edhe më i madh se popullariteti i kryeministrit ukrainas. Është e sigurt.”
” O zot, Boris Johnson ka dhënë dorëheqjen. Në Shtetet e Bashkuara ka zgjedhje në vjeshtë. Jam i tronditur. Shpresoj se nuk do të ngelim prapa.”
Megjithatë ukrainasit janë besimplotë se do të kenë mbështetjen edhe të kryeministrit të ardhshëm të Mbretërisë së Bashkuar.
“Është për të ardhur keq, sepse Boris Johnson është një mik i madh i Ukrainës. Por unë u besoj vërtet se në përgjithësi politika britanike do të jetë e njëjtë. Ndoshta pasardhësi i Borisit do të jetë ministri i Mbrojtjes ose i Punëve të Jashtme. Të gjitha ata janë miq të mëdhenj të Ukrainës.”
Ndërkohë gara për të zëvendësuar Boris Johnsonin ka nisur jozyrtarisht në Londër brenda Partisë Konservatore.
Johnson dha të enjten dorëheqjen pas disa skandaleve qeveritare dhe pas largimeve të njëpasnjëshme të kabinetit të tij qeverisës.
Ai do të vijojë të jetë kreu i qeverisë deri në vjeshtë, kohë kjo kur pritet të zgjidhet edhe pasardhësi i tij brenda konservatorëve.
Discussion about this post