Kanë qenë të shumta rastet kur qytetarët abuzojnë me raporte mjekësore false ose të marra nga mjekët me ryshfet dhe i përdorin ato për të përfituar KEMP. Për këtë arsye, janë bërë një sërë ndryshimesh në rregulloren për kriteret e lëshimit të raporteve elektronike nëpërmjet sistemit e-Raporte nga mjeku i familjes, mjekët specialistë dhe anëtarët e Komisionit Mjekësor. Këto ndryshime sjellin ashpërsim gjobash për të gjithë ata që abuzojnë. Rregullorja thotë se, në raste të tilla çështja do të shkojë në ndjekje penale, si për mjekët që lëshojnë këto raporte false, edhe për qytetarët që përfitojnë në mënyrë të tillë. Ndërsa gjobat variojnë nga 50 mijë lekë në 200 mijë lekë.
“Me rregullat e reja mjekët që lëshojnë raporte mjekësore me diagnoza të ndryshme pa u shoqëruar me ekzaminime përkatëse, dënohet me gjobë nga 10.000 lekë; lëshimi i raporteve me prapaveprim në kundërshtim me përcaktimet e kësaj rregulloreje dënohen me gjobë nga 15.000 lekë; lëshimi i raporteve në kundërshtim me kushtet ligjore dënohet me gjobë nga 20.000 lekë; përcaktimi i diagnozave në kundërshtim me “Kriteret klinike orientuese për caktimin e paaftësisë së përkohshme në punë” dënohet me gjobë nga 10,000 lekë; e mos përcaktimi i saktë i diagnozës bazuar në ekzaminimet dhe analizat përkatëse, dënohet me gjobë nga 5,000 lekë; f) përcaktimi i afatit të periudhës së paaftësisë së përkohshme në punë në kundërshtim me kriteret klinike dhe afatet e përcaktuara, dënohet me gjobë nga 5,000 lekë”, përcakton dokumenti.
Kujtojmë se në lidhje me çështjen e abuzimit për KEMP-et apo raportet e paaftësisë ka nxjerrë një raport më parë KLSH dhe vetë Ministria e Financave, ku tregonin se bashkitë kryenin abuzime të mëdha. Pasi shumë personave që nuk kishin nevojë iu ishte lidhur një KEMP në këmbim të parave, nga miqësia në Administratë ose gjatë fushatës zgjedhore. Ndërsa familjeve që vërtet kishin nevojë për atë kompensim minimal, bashkitë ua ndërprisnin. Deri më sot nuk kemi parë që SPAK apo institucione të tjera përgjegjëse të ndërhyjnë, përveç ndryshimit të këtyre rregulloreve. Por, rezultat tregojnë qartë se rregullorja shkelet herë pas herë, për shkak se aplikimi i gjobave nuk zbatohet.
Pagesë paaftësie për të karantinuarit
Tani e tutje do mund të marrin raport paaftësie të përkohshme të marrë shpërblim edhe ata persona që karantinohen nga prekja e ndonjë virusi, si dhe të gjithë ata që i ushtrohen kimioterapive. Kështu ka vendosu qeveria përmes ndryshimeve që ka bërë në rregulloren për kriteret e lëshimit të raporteve elektronike. Një nga ndryshimet që është bërë, është shtimi i 2 pikave të reja; së pari, dhënia e raportit të përkohshëm të paaftësisë për të gjithë personat që preken nga kanceri, apo sëmundje të tjera të rënda dhe janë në proces kimioterapie. Së dyti, përfitojnë raportit për paaftësi për të punuar të gjithë ata që për një arsye të caktuar mjekësore duhet të karantinohen.
“Kur i punësuari është duke u trajtuar me kimioterapi ose radioterapi, i cili ka kryer ose jo ndërhyrje për sëmundjen bazë, ka të drejtën për t’u pajisur me raport të paaftësisë së përkohshme në punë nga mjekët specialistë të shërbimit përkatës. Raporti mjekësor për paaftësi të përkohshme në punë, për persona të vendosur në karantinë mjekësore, lëshohet sipas përcaktimeve në legjislacionin në fuqi për sëmundjet infektive”, thuhet në dokument. Ndërkohë, më poshtë theksohet se, afati i raportit mjekësor për paaftësi të përkohshme në punë për sëmundje të përgjithshme mund të zgjatet nga Komisioni Mjekësor deri në 6 muaj nga data e lindjes të së drejtës së trajtimit me raport mjekësor. Më pas, nëse është i nevojshëm, ky afat mund të shtyhet edhe me 3 muaj të tjerë.
“Afati i raportit mjekësor për paaftësi të përkohshme në punë për sëmundje të përgjithshme mund të zgjatet nga Komisioni Mjekësor deri në 6 muaj nga data e lindjes të së drejtës së trajtimit me raport mjekësor. Pas përfundimit të periudhës 6-mujore, periudha e përfitimit mund të zgjatet përjashtimisht 3 muaj të tjerë, në rast se komisioni i mjekëve ekspertë (KMCAP) provon që personi i punësuar do të shërohet në këtë periudhë dhe nuk do të deklarohet invalid”, përcaktohet në dokument. Ndërkaq, në rregullore gjithashtu përcaktohet se për nënën, babain ose kujdestarin ligjor i cili duhet të kujdeset efektivisht për fëmijën deri në moshën 14 vjeç, i cili trajtohet jashtë Shqipërisë për diagnoza të rënda, pajiset me raport mjekësor për kujdes ndaj fëmijës me afat deri në 30 ditë.
Raport kur ndryshohet vendi i punës
Një tjetër risi në këtë rregullore është i punësuari që për arsye shëndetësore duhet të ndryshojë vendin e punës, pas ditës së 14-të të trajtimit me raport mjekësor nga mjeku i familjes, ka të drejtë të përfitojë nga sigurimet Shoqërore kompensimin e të ardhurave sipas ligjit në fuqi për sigurimet shoqërore.
“Kompensimi për të punësuarin nuk mund të jetë më shumë se 50 për qind e mesatares ditore të bazës së vlerësuar neto të gjashtë muajve të fundit nga data e lindjes të së drejtës dhe jepet për një periudhë jo më shumë se 3 muaj gjatë një viti, nga dita e fillimit të sëmundjes, për të cilën është ndryshuar vendi i punës. Kompensimi për gruan shtatzënë që ndryshon vendin e punës nuk mund të jetë më shumë së 50 për qind e mesatares ditore të bazës së vlerësuar neto të dymbëdhjetë muajve të fundit, nga data e lindjes të së drejtës për pagesë”, thuhet në dokument.
Ndërsa më tutje sqarohet se, shuma e të ardhurave që do të përfitohet për kompensim për këto raste është e barabartë me diferencën ndërmjet pagës së vendit të punës së mëparshme dhe pagës së vendit të punës së re. Duke bërë të ditur se këto ndryshime nuk kanë efekte prapavepruese, pra do të përfitojnë vetëm ata që marrin raport nga momenti që ndryshimet hyjnë në fuqi/ Esmeralda Hida/
Discussion about this post