Prej muajsh në burgun e Fierit, ish-ministri Tahiri transferohet drejt Lushnjës

Ish-ministri i Brendshëm Saimir Tahiri, i cili vuan dënimin me burg prej 3 vitesh e 4 muajsh, është duke u transferuar nga IEVP e Fierit në IEVP e Lushnjës.

Sipas raportimeve, shkak për transferimin e Tahirit është bërë një përplasje që ai ka pasur me drejtorin e burgut Arjan Hasani.

Ish-ministri i Brendshëm ka pasur ankesa lidhur me kushtet që ka vendosur administrata e burgjeve për të dënuarit si dhe për rregullat që duhet të ndjekin familjarët që vizitojnë të afërmit e tyre që mbahen të izoluar.

Një nga mosmarrëveshjet ka qenë tregtimi i ujit brenda ambienteve të burgut. Sipas rregullores së burgut, të dënuarit nuk duhet të furnizohen me ujë nga familjarët. Pas këtyre përplasjeve, Tahiri i ka kërkuar drejtorit transferimin në një tjetër institucion të vuajtjes së dënimit.

Mësohet se ish-ministri është transferuar në Lushnje.