Kryeministri i Kosovës Albin Kurti ka pritur të dielën në takim pesë policët të cilët morën lëndime si pasojë e një sulmi në Veri të Kosovës, pasi synonin ta ndalin një mjet transportues që donte të kontrabandonte. Kurti ka kritikuar edhe prokurorinë, duke thënë se në mungesë të punës efikas të prokurorisë aksionet e Policisë mbeten të papërfunduara.
“Policia jonë çdo ditë demonstron vendosmëri dhe shkathtësi për të siguruar ligjshmërinë në tërë territorin e Republikës. Përderisa puna profesionale e policëve ka arritur të sjell personat e dyshuar para drejtësisë, kjo e fundit, në këtë rast Prokuroria, liron njërin të dyshuar në procedurë të rregullt, sipas pohimeve të policëve”.
Gjatë këtij takimi ka marrë pjesë edhe Drejtori i policisë së Kosovës, Samedin Mehmeti. Kryeministri Kurti shprehu falënderim dhe mirënjohje të thellë për trimërinë dhe profesionalizimin e tyre për të qenë në krye të detyrës, teksa u uroj shërim të plotë sa më të shpejtë. Ai theksoi që shteti ligjor dëshmohet me punën e zellshme të prokurorisë dhe efikase të gjyqësorit.
“E për të dëshmuar përkushtimin dhe aftësinë në vendosjen e sundimit të ligjit, duhet pritur veprimet e mëtutjeshme të prokurorisë.”
Kryeministri Kurti shtoi se luftimi i krimit të organizuar dhe vendosja e rendit dhe ligjshmërisë mbeten ndër prioritetet kryesore të Qeverisë dhe se për këtë policia e Kosovës gjithmonë do ta ketë mbështetjen e plotë.
Discussion about this post