Prej më shumë se një jave Evropa është përfshirë nga zjarre të mëdha, që kanë detyruar shumë vende të evakuojnë banorët nga zonat me rrezikshmëri të lartë. Franca ka evakuuar më shumë se 16 mijë banorë në jugperëndim të vendit.
Ndërkohë të paktën 238 persona kanë humbur jetën brenda një jave si pasojë e temperaturave rekord në Portugali.
Temperaturat iu afruan 50°C në qytetin Pinhao të enjten, një rekord në korrik. Zjarret kanë vazhduar të shpërthejnë në të gjithë Portugalinë, Spanjën fqinje, Francën dhe Kroacinë në 10 ditët e fundit, duke detyruar mijëra banorë dhe turistë të evakuohen.
Në Spanjën jugore, më shumë se 3,200 njerëz u larguan nga zjarret në kodrat Mijas, megjithëse më vonë disa mundën të ktheheshin. Më shumë se 1000 vdekje janë shkaktuar nga vapa në Portugali dhe Spanjë ditët e fundit.
Ndërsa në të gjithë Mesdheun nga Maroku deri në Kretë mijëra zjarrfikës dhe shumë avionë me ujë janë vendosur për të neutralizuar zjarret. Valët e të nxehtit janë bërë më të shpeshta, më intensive dhe zgjasin më gjatë për shkak të ndryshimeve klimatike të shkaktuara nga njerëzit.
Bota tashmë është ngrohur me rreth 1.1C që nga fillimi i epokës industriale dhe temperaturat do të vazhdojnë të rriten nëse qeveritë në mbarë botën nuk bëjnë shkurtime të mëdha në emetimet e karbonit.
Discussion about this post