Kryeministri i Kosovës Albin Kurti gjatë fjalës së tij në seancën e sotme të Kuvendit, ku po diskutohet për krizën energjitike, tha se qeveria po përgatit një masë për t’u dalë në ndihmë një shtrese të konsumatorëve shtëpiakë.
Duke folur në Kuvend për situatën energjetike dhe paralajmërimin për një krizë të re, Kurti tha se përmes subvencionimit të disa konsumatorëve, synojnë të ulin shpenzimet e energjisë elektrike.
“Ministria është duke e përgatitur edhe një masë për efiçiencë të energjisë për konsumatorët shtëpiakë. Përmes subvencioneve, do të ndihmohen konsumatorët që të ulin shpenzimet e energjisë elektrike. Ndihma më e madhe do të koncentrohet te rastet e skemës sociale dhe te rastet që janë në nevojë, por s’janë të përfshirë në skemën sociale”.
Kurti tha se aktualisht, në termocentralin “Kosova B” janë në remont kapacitetet gjeneruese. Ai tha se kështu po përgatiten për sezonin e dimrit. Kurti tha se do të ketë remont të rregullt jashtë dimrit edhe në termocentralin “Kosova A”.
“Kapacitetet gjeneruese të termocentraleve gjatë sezonit së verës janë në remont të rregullt te ne. Njëri bllok i Kosovës B është në remont të rregullt dhe pritet të përfundojë gjatë këtij muaji, ndërsa blloku tjetër i Kosovës B do të hyjë në remont gjatë muajit gusht dhe do të zgjasë rreth 25 ditë”.
Discussion about this post