Edhe pse është në prag të përfundimit të mandatit, presidenti Ilir Meta nuk ka ngurruar t’i kërkojë llogari qeverisë për disa çështje. Ditën e sotme ai tregon se i ka dërguar një letër kryetares së Kuvendit, Lindita Nikolla, në lidhje me çështjen e detit me Greqinë. Përmes kësaj letre Meta shprehet se qeveria nuk është treguar transparente dhe nuk e ka vënë në dijeni Presidencën për hapat që janë ndjekur. Duke hedhur akuza se qeveria po kurdis diçka nën hije, Meta i ka kërkuar që i gjithë procesi të bëhet menjëherë transparent dhe çdo hap t’i njoftohet kreut të shtetit. Ndërsa ka garantuar se ai vetë do të merret me këtë çështje edhe pas përfundimit të mandatit si president.
“Para së gjithash, dhe që në hyrje të këtij informacioni vlerësoj të domosdoshme të theksoj që Këshilli i Ministrave dhe Ministria e Evropës dhe Punët e Jashtme përgjatë gjithë këtij procesi nuk kanë treguar luajalitet dhe sinqeritet me Presidentin e Republikës, i cili në rastin më të mirë është informuar me vonesë dhe post factum, jo plotësisht, ashtu siç dhe veprime e zgjedhje të qeverisë lidhur me këtë çështje janë bërë në mënyrë të njëanshme dhe pa marrë as mendimin e Presidentit të Republikës.
Në këto akte, por edhe përmes shkresave e komunikimeve të tjera që u kanë paraprirë, e kam vendosur në dijeni Kryeministrin për disa devijime, mangësi proceduriale, apo shkelje të kryera nga Ministria për Evropën dhe Punët e Jashtme, dhe më pas gjatë raundit të dytë dhe të tretë të negociatave edhe nga disa prej anëtarëve të të Grupit Negociator, shkelje këto të papranueshme për Presidentin e Republikës, dhe që kanë cenuar rëndë besimin e dhënë prej tij me autorizimin për dhënien e plotëfuqisë”, shkruan Meta.
Kujtojmë se, ditën e sotme ministri grek i Jashtëm, Dendias, ka bërë me dije se Greqia dhe Shqipëria kanë rënë dakord që shteti helen të ketë 12 milje në detin Jon. Kështu ai ka kërkuar që këtë premtim qeveria shqiptare ta hedh sa më parë në letër.
Discussion about this post