Ministria e Financave ka njoftuar se do të shtyhet afati për depozitimin e pasqyrave financiare në regjistrin tregtar. Ministrja e Delina Ibrahimaj tregoi se ky vendim u morr për shkak të sulmit kibernetik mbi e Albania. Afati për depozitimin e pasqyrave financiare në regjistrin tregtar do të shtyhet për aq ditë sa nuk ka funksionuar portali qeveritar e-Albania. Ndërsa më pas të gjithë bizneset duhet të bëjnë raportimin sipas ligjit.
“Njoftim për bizneset mbi afatin e depozitimit të pasqyrave financiare. Ministria e Financave dhe Ekonomisë njofton se, duke u nisur nga situata e krijuar ditët e fundit për arsye të mosfunksionimit të portalit qeveritar e-Albania, Qendra Kombëtare e Biznesit do të zbatojë parashikimet e Kodit të Procedurave Administrative lidhur me afatin për depozitimin e pasqyrave financiare në regjistrin tregtar. Bazuar në nenin 54 të Kodit të Procedurave Administrative, afati për depozitimin e pasqyrave financiare në regjistrin tregtar do të shtyhet për aq ditë sa nuk ka funksionuar portali qeveritar e-Albania. Subjektet që nuk kanë aplikuar akoma për depozitimin e pasqyrave financiare do të rivendosen për depozitimin e tyre brenda periudhës së shtyrjes së afatit fillestar”, thuhet në njoftim.
Kujtojmë se këtë mëngjes ishte Konfindustria që i kërkoi ministrisë shtyrjen e afatit, pasi shumë biznese po hasin probleme teknike dhe procedurale për regjistrimin e pasqyrave financiare.
Discussion about this post