Ndonëse kanë kaluar ditë që nga njoftimi i qeverisë ku sqarohej që portali E-albania është funksional, ende bizneset nuk mund të marrin shërbime. Së fundmi, ministria e Financave ka vendosur të shtyjë depozitimin e pasqyrave financiare në regjistrin tregtar për të mos penalizuar këto subjekte.
Sipas ministres Delina Ibrahimi, shtyrja e afatit do të zgjatet për aq ditë sa nuk do të funksionojë shërbimi online.
“Bazuar në nenin 54 të Kodit të Procedurave Administrative, afati për depozitimin e pasqyrave financiare në regjistrin tregtar do të shtyhet për aq ditë sa nuk ka funksionuar portali qeveritar e-Albania. Subjektet që nuk kanë aplikuar akoma për depozitimin e pasqyrave financiare do të rivendosen për depozitimin e tyre brenda periudhës së shtyrjes së afatit fillestar”
Që prej 17 korrikut bizneset nuk kanë mundur të dorëzojnë bilancet e vitit 2021, kjo pasi nga mosfunksionimi i portalit E-Albania nuk konfirmohet përfundimi i operacionit. Afati zyrtar fillestar i dorëzimit të pasqyrave financiare të subjekteve ishte 31 korriku. Pas kësaj date ligji parashikonte vendosjen e gjobave për bizneset që nuk e kanë kryer këtë shërbim.
Këtë viti gjoba për mosdorëzim bilanci është rritur në 60 mijë lekë nga 15 mijë që ishte më parë. Por me shtyrjen e afatit nga ministria kjo masë administrative për vonesat nuk do të zbatohet nga Tatimet. Detyrimin ligjor për dorëzimin e bilanceve vjetore e kanë rreth 20 mijë subjekte.
Discussion about this post