Detaje të reja janë zbardhur nga arrestimi i vrasësit me pagesë të ish drejtorit të OST-së, Saimir Jaku, ekzekutuar në vitin 2016. Arrestimi i Dorjan Keqit, 40-vjeçari lindur në Kurbin dhe banues në Krujë, është bërë pranë gjykatës së Lezhës.
Sipas burimeve policore, mësohet se ai kishte shkuar në gjykatë për t’u paraqitur në një proces gjyqësor për drejtimin e makinës pa leje qarkullimi.
Në këtë kohë, forcat e policisë kanë ndërhyrë dhe kanë bërë arrestimin e tij, të planifikuar, në operacionin e koduar “Gjurma”.
“Në kuadër të hetimeve të kryera nga strukturat hetimore të DVP Lezhë, në bashkëpunim me Prokurorinë, bazuar në provat e grumbulluara, Prokuroria pranë Gjykatës së Rrethit Gjyqësor Lezhë nxorri urdhër ndalimi për këtë shtetas, për veprat penale “Vrasja në rrethana të tjera cilësuese”, kryer në bashkëpunim dhe “Prodhimi dhe mbajtja pa leje e armëve luftarake e municionit”.
Ky shtetas, në bashkëpunim me shtetas të tjerë, dyshohet se e ka kryer krimin e vrasjes së shtetasit Saimir Jaku, kundrejt pagesës. Porositësit e vrasjes dyshohet të jenë një grup i strukturuar kriminal që vepron në qarkun Lezhë, tashmë të identifikuar dhe nën hetim nga ana e Policisë. Për shkak të cilësisë së hetimit dhe të ruajtjes së sekretit hetimor, nuk mund të bëjmë publike të dhëna të tjera për këtë çështje.
Gjatë kontrollit të ushtruar në banesën e shtetasit të ndaluar D. K., në kuadër të operacionit policor “GJURMA”, janë gjetur dhe sekuestruar në cilësinë e provës materiale 21 aparate celulare dhe 6 mbajtëse të kartave SIM. Vazhdojnë hetimet për dokumentimin e plotë e ligjor të kësaj ngjarjeje”, bëri me dije policia në një njoftim për mediat.
Discussion about this post