Në një konferencë që po zhvillon me mediat ish-presidenti Ilir Meta ka reaguar në lidhje me skandalin e drejtorit të Doganave Gent Gazheli. I revoltuar ai i ka kërkuar Ramës të heq urgjentisht nga Doganat Gazhelin dhe bandën e patronazhistëve. Sipas tij, këto skandale na tregojnë pse vendi ynë po kalon një krizë çmimesh dhe si qytetarët po vidhen çdo ditë.
“Qytetarët shqiptarë ishin ata që u mbështetën më pak nga qeveria gjatë krizave të kaluara, si gjatë pandemisë ashtu edhe gjatë krizës së rritjes së çmimeve. Kjo situatë provohet edhe nga skandalet më të fundit siç janë edhe doganat shqiptare. Drejtimi i doganave nga kontrabandistë, nepotizimi për vendet e punës, tregon qartë se çdo sektor i qeverisjes është kthyer në sektor abuzimi.
Prandaj dua t’i bëj thirrje Ramës të heqë urgjentisht nga doganat gjithë bandën e patronazhistëve. Situata në dogana është edhe më e rëndë. Të ardhurat janë më pak se në çdo vend tjetër në Ballkanin Perëndimor. Janë 20% më pak se në Maqedoninë e Veriut. Kjo qeveri ua bën qytetarëve edhe më të pashpresë të ardhmen në këtë vend”, u shpreh Meta. Pak para tij reagoi për këtë çështje edhe PD, e cila në një deklaratë për mediat shprehet se Gazheli është hajduti i radhës që po përdoret nga Rama.
Discussion about this post