Gjykata e kryeqytetit nuk e zhbllokoi as në këtë seancë procesin ndaj Bledar Jambellit dhe Kristaq Lecit, nën akuzë për vrasjen e kryekomisar Artan Cuku. Procesi u shty për në 14 shtator, por gjykata nuk arriti të vendosë nëse ndërkohë do t’i njoftojë apo jo autoritetet greke që i kanë në burg të dy të dyshuarit.
Shkak për zvarritjen e procesit u bë mungesa e avokatëve, që ashtu si mungesa e dy të akuzuarve për atentatin ndaj oficerit të policisë e kanë futur gjykimin në ngërç, meqenëse policia shqiptare nuk po realizonte njoftimin e Jambellit dhe Lecit. Por tani që të dy ata u arrestuan dhe gjenden në qeli, drejtësia duhet t’i vendosë në dijeni për të bërë të mundur çeljen e gjykimit për atentatin që Jambelli porositi dhe e realizoi në 2017 me ndihmën e Lecit dhe Mikel Shallarit.
Vrasja e oficerit u kategorizua si vrasje për shkak të detyrës, megjithëse nga 2017, drejtësia ka dështuar jo vetëm të ketë përballe Jambellin që u hakmorr mbasi ish-zyrtari i policisë së Vlorës e kishte arrestuar, por edhe që të gjejë një shteg juridik për ta ekstraduar. Mikel Shallari u zbulua përmes ADN, por ai është i vetmi që është dënuar deri më tani.
Discussion about this post