Presidenti i Rusisë nënshkroi programin e ardhshëm ushtarak në det, përmes të cilit shenjëstrohet drejtpërsëdrejti Uashingtoni. Doktrina e re luftarake u nënshkrua në Shën Petërburg, në kuadër të Ditës Kombëtare të Marinës Detare.
Kërcënimi kryesor sipas programit është politika strategjike e SHBA-së për të dominuar oqeanet e botës dhe lëvizja e aleancës ushtarake të NATO-s më afër kufijve të Rusisë.
Lideri rus u zotua se Moska do të vetëmbrohet ndaj kërcënimeve të jashtme nëse mjetet diplomatike nuk arrijnë të zgjidhin situatën.
Pas inspektimit të marinës, Putin mbajti një fjalim të shkurtër në të cilin ai premtoi dorëzimin e afërt të raketave hipersonike në anijet luftarake.
Sinkron Putin: Ne do të bëjmë të mundur shumë shpejt që aftësitë e marinës të jenë në gjendje t’i përgjigjet me shpejtësi rrufe të gjithë atyre që vendosin të cenojnë sovranitetin dhe lirinë tonë.
Armët hipersonike mund të udhëtojnë me nëntë herë shpejtësinë e zërit, dhe Rusia ka kryer testime të mëparshme të Zircon nga anijet luftarake dhe nëndetëset gjatë vitit të kaluar.
Putin nuk e përmendi konfliktin në Ukrainë gjatë fjalimit të tij, megjithëse programi ushtarak në det parashikon forcimin gjithëpërfshirës të pozitës gjeopolitike të Rusisë në Detin e Zi dhe Azov.
Sipas programit vihet në objektiv edhe Oqeani Arktik për të cilin Shtetet e Bashkuara kanë thënë vazhdimisht se Rusia po përpiqet ta militarizojë, si një zonë me rëndësi të veçantë për Moskën.
Discussion about this post