Ditën e sotme deputeti demokrat, Belind Këlliçi ka kujtuar, 17-vjeçarin, Ardit Gjoklajn, i cili u gjet i masakruar në landfillin e Sharrës mesditën e 7 gushtit, para 6 vitesh. Këlliçi me anë të një postimi shprehet se nëse nuk do të ishte makineria korruptive Veliaj, të miturit nuk do të bëheshin viktima të mafias së plehrave.
“6 vjet pa Arditin! Ardit Gjoklaj do të ishte sot 23 vjeç nëse makineria korruptive Erion Veliaj nuk do t’i bënte të miturit viktima të mafias së plehrave. Arditi punonte mes plehrave për të siguruar të ardhura për shkollimin e tij. Një hero 17-vjeçar që ndynte duart dhe mushkëritë, në kushte çnjerëzore, për t’i bërë ballë sistemit kriminal të mbijetesës që u imponohet shqiptarëve që në fëmijëri”, shkruan Këlliçi.
Ai vazhdon më tej duke thënë se Gjoklaj zgjodhi të jetojë me ndershmëri në ambientin më të pandershëm, më të pistë dhe shfrytëzues që ka njohur Shqipëria. Po ashtu deputeti shkruan se i ka dhënë fjalën prindërve të Arditit se do të vendos drejtësi.
“Ardit Gjoklaj zgjodhi të jetojë e punojë me ndershmëri në ambientin më të pandershëm, më të pistë dhe shfrytëzues që ka njohur Shqipëria. I kam dhënë fjalën e nderit prindërve të tij se do të kërkoj drejtësi deri në fund të botës për birin e tyre, se do t’i bëhem makth kryeplehrës që i mori jetën dhe SPAK-ut që fle mbi dosjen e zezë të Erion Veliajt. Drejtësi për Arditin derisa Erion Veliaj të shkojë mbrapa hekurave, aty ku e ka vendin!”, ka shkruar Këlliçi.
Kujtojmë që 17-vjeçari ishte punësuar në impiantin e seleksionimit të mbetjeve të kompanisë “3R” shpk në Sharrë, me shpresën se do të mblidhte paratë e nevojshme për të blerë librat e shkollës, pa rënduar familjen që mbahej vetëm me rrogën e kryefamiljarit polic, mirëpo mundi i tij u pre në mesë në 7 gusht, 6 vite më parë.
Discussion about this post