Tërmet te Partizani, shkarkohet trajneri Dritan Mehmeti

Partizani duhet të gjejë trajner të ri, pasi presidenti Gaz Demi ka vendosur që të shkarkojë teknikun Dritan Mehmeti.

Humbja në miqësoren e fundit kundër Bylisit, me tre gola diferencë, ka pasur një ndikim të madh, ndërkohë që më parë ishte eliminuar në turin e parë të Conference League.

Mehmeti e kishte marrë drejtimin e skuadrës fazën e dytë të sezonit të shkuar, teksa pasoi Ilir Dajën.

NJOFTIMI I KLUBIT KRYEQYTETAS

“FK Partizani njofton përfundimin e bashkëpunimit me trajnerin Dritan Mehmeti. Në prag të startit të kampionatit, drejtuesit dhe traineri Mehmeti kanë zhvilluar një takim, në përfundim të të cilit palët kanë vendosur të ndahen miqësisht dhe të ndërpresin bashkëpunimin mes tyre.

Partizani falënderon Dritan Mehmetin për punën dhe kontributin e dhënë përgjatë gjithë periudhës si pjesë e klubit dhe së fundmi në drejtimin e ekipit të parë, duke i uruar njëkohësisht shumë suksese në të ardhmen”.