Në Mars të vitit 2022, Autoriteti i Konkurencës autorizoi blerjen e kompanisë celulare “One” nga grupi financiar “4iG”.
Më herët, shoqëria hungareze kishte blerë edhe shumicën e aksioneve të kompanisë “Albtelekom Albania”, e cila ofronte shërbimin e telefonisë së lëvizshme.
Vendimi i Autoritetit të Konkurencës ishte i paprecedent, pasi lejonte situatën e duopolit në tregun e telefonisë mobile, e cila tashmë ndahet mes “One” dhe “Vodafone Albania”.
I bindur se autorizimi për shitjen e “One” nga pronari i mëparshëm tek hungarezët e “4ig” mund të sillte deformime të tregut, institucioni i Konkurencës i drejtuar nga Denar Biba, deklaroi se do të mbante në monitorim të rreptë veprimtarinë e operatorit të ri në treg.
Këtë “monitorim të rreptë” do ta kryente në bashkëpunim me Autoritetin e Komunikimeve Elektronike dhe Postare (AKEP).
Por, premtimi i Autoritetit duket se ishte më shumë justifikim për të lejuar grupin financiar hungarez që të shtrihej fuqishëm në tregun shqiptar, duke kufizuar konkurencën dhe rrjedhimisht edhe interesat e qytetarëve/klientë shqiptarë.
Në Korrik 2022, AKEP-i, në vijim të një procedure tjetër të nisur më herët për tregun e telefonisë celulare, informon Autoritetin e Konkurencës se “tregu i shërbimeve celulare me pakicë, është treg që nuk rregullohet nga AKEP dhe mbetet jashtë detyrave të tij funksionale”.
Pra AKEP-i, institucioni që u konsiderua si aleati më i rëndësishëm i Autoritetit të Konkurencës për të “monitoruar rreptë” kompaninë “One”, në fakt nuk e ka aspak kompetencë ligjore për t’u marrë me këtë çështje.
Mbetet vetëm institucioni i Denar Bibës, i cili e ka të qartë se vendimi për të lejuar situatën duopol mund të sjellë pasoja të fuqishme negative në tregun e telefonisë celulare.
Kompania me kapital publik hungareze “4iG Nyilvanosan Mukodo Reszvenytarsasag”, hyri zyrtarisht në tregun e telefonisë shqiptare në fillim të këtij viti.
Në 14 janar 2022, Autoriteti i Konkurencës autorizoi “përqendrimin e realizuar nga përftimi i kontrollit nëpërmjet blerjes së 80.27% të aksioneve të shoqërisë Albtelecom SHA nga shoqëria 4iG Nyilvanosan Mukodo Reszvenytarsasag”.
Në atë rast, Autoriteti i Konkurencës konstatoi se transaksioni “nuk do të krijojë apo forcojë pozitën dominuese, duke qenë se shoqëria blerëse 4iG Nyrt nuk operon në këtë treg dhe si rrjedhim nuk do të ketë ndryshim të pjesëve takuese dhe strukturës së tregut pas transaksionit”.
Por, në mars 2022, situata ishte shumë më e ndryshme.
Në 8 Mars, Autoriteti i Konkurencës autorizoi “blerjen e 100% të aksioneve të shoqërisë Albania Telecom Invest AD (“One”) nga shoqëria 4iG Nyilvanosan Mukodo Reszvenytarsasag”.
Tashmë, kompania hungareze ishte pjesë e tregut të telefonisë në Shqipërisë dhe blerja e shoqërisë “One” mund të krijonte deformime në treg.
Ndaj, Autoriteti i Konkurencës dha autorizimin e tij me kushtin që kompania hungareze “të sillej mirë”, duke i këshilluar që të mos abuzonte me pozitën dominuese në treg.
Nga ana tjetër, Konkurenca i sugjeroi AKEP-it “të realizojë analizën e tregut me pakicë të shërbimit të telefonisë fikse dhe celulare, duke shpallur operatorët me Fuqi të Ndjeshme në Treg (FNT), si dhe duke përcaktuar masa rregulluese/detyrime sipas përcaktimeve ligjore”.
Por, AKEP-i nuk e ka këtë kompetencë, gjë që krijon të gjithë hapësirat për mundësinë e abuzimit të kompanive që operojnë në tregun e telefonisë celulare. Nga Boldnews.al
Discussion about this post