Këshilli Bashkiak i Vlorës nuk dorëzohet. Në një tjetër njoftim, Këshilli ka vënë në dijeni kryebashkiakun Dritan Leli që të paraqitet në datën 30 qershor në orën 10:00 në ambientet e teatrit “Petro Marko”. Pasi refuzuan Lelin për balafaqimin online, Këshilli Bashkiak ka kërkuar një tjetër takim përballë me kryebashkiakun.
Në këtë mbledhje do të miratohet dhënia për ndihmën ekonomike, lista e familjeve dhe individëve që përfitojnë banesë me kosto të ulët nëpërmjet subvencionimit të interesave të kredive nga buxheti i bashkisë Vlorë, lista për fëmijët e familjeve me probleme të thella socialekonomike që do të frekuentojnë çerdhet dhe kopshtet me drekë për një periudhë 6-mujore me të ardhurat e bashkisë, të cilat mbetën pezull pas mungesës së tyre në mbledhjene sotme.
Ndër të tjera në rendin e ditës, thuhet se kërkohet transparencë mbi vendimet e marra dhe urdhëruesit e pengimit të Këshillit Bashkiak për kryerjen e detyrës së tij në mbledhjet e parashikuara për t’u zhvilluar më datën 15 dhe 22 qershor 2021, raportim të Kryetarit të Bashkisë në lidhje me shqetësimin e komunitetit vlonjat për gjendjen e shërbimeve vendore, situatën e shërbimeve bazike të pastrimit, mirëmbajtjes, ndriçimit etj. si dhe trajtimin e ankesave të qytetarëve. Leli ende nuk është përgjigjur dhe nuk dihet nëse do të shkojë këtë herë në mbledhje.
Dritan Leli ka refuzuar më herët tre herë mbledhjen e Këshillit Bashkiak për shkak të masave anti-Covid që ishin planifikuar të mbaheshin në ambientet e Universitetit “Ismail Qemali” dhe në ambientet e Teatrit “Petro Marko” Leli i shmangu me “procedurë” mbledhjet e Këshillit Bashkiak, pasi sipas tij duhen respektuar masat anti-COVID. Pavarësisht se Ministria e Shëndetësisë i dha lejen, Leli ka dashur të tregohet korrekt dhe ka preferuar të mos shkojë.
