Shkelën perimetrin e sigurisë, bllokohen 2 skafe dhe një gomone në plazhet e jugut

Policia Kufitare përgjatë bregdetit në Vlorë, Sarandë dhe Himarë, në kuadër të masave për rritjen e parametrave të sigurisë në plazhe, ka bllokuar 4 mjete lundruese gjatë kësaj jave. Një skaf dhe një gomone janë bllokuar në plazhin e Ksamilit dhe Qeparos, pasi nuk respektuan zonën e kufizuar për mjetet lundruese. Gjithashtu janë ndëshkuar me 10.000 lekë të rinj, pronari i mjetit lundrues skaf dhe me masën administrative 100.000 lekë të rinj, pronari i mjetit lundrues gomone.

Gjithashtu është bllokuar dhe një tjetër mjet lundrues skaf, në plazhin e Jalës dhe ndëshkohet me gjobë 10.000 lekë të rinj, drejtuesi, pasi nuk posedonte dokumentacionin përkatës në bord.

E njëjta gjë edhe në plazhin e Sarandës, ku në kuadër të masave të marra për mbarëvajtjen e sezonit turistik, kanë konstatuar në plazhin e Ksamilit, një mjet lundrues tip skaf duke lëvizur brenda zonës së kufizuar për mjetet lundruese dhe menjëherë kanë bërë shoqërimin e tij, në portin e Sarandës, për verifikime të mëtejshme. Drejtuesi i skafit, 19-vjeçari me inicialet R. L., banues në Ksamil, u ndëshkua me gjobë 100.000 lekë të rinj, pasi nuk respektoi zonën e kufizuar për mjetet lundruese, si dhe iu bë bllokimi i mjetit lundrues dhe u ndëshkua me gjobë 10.000 lekë të rinj, pasi gjatë kontrollit rezultoi pa dokumentacionin përkatës, në bord.

Po në vijim të kontrolleve, në portin e Himarës është bërë bllokimi i një mjeti lundrues tip gomone, pamjet e të cilit janë pasqyruar dhe në rrjetet sociale, pasi është konstatuar nga shërbimet e Policisë Kufitare në Himarë, konkretisht në plazhin e Qeparos, duke lëvizur brenda zonës së kufizuar për mjetet lundruese. Drejtuesi i këtij mjeti lundrues, shtetasi A. V., 54 vjeç, banues në Qeparo, u ndëshkua me masën administrative 100.000 lekë të rinj, si dhe iu bë bllokimi i mjetit lundrues gomone për 5 ditë.

Gjithashtu po nga shërbimet e Policisë Kufitare Himarë, në plazhin e Jalës, është konstatuar një mjet lundrues tip skaf, i cili gjatë kontrollit ka rezultuar pa dokumentacionin përkatës në bord. Drejtuesi i këtij mjeti lundrues, shtetasi S. L., 48 vjeç, banues në Himarë, u ndëshkua me masën administrative 10.000 lekë të rinj, si dhe iu bë bllokimi i mjetit lundrues për 5 ditë.