Tenderi për monitorimin e parametrave mjedisore në inceneratorin e Elbasanit është ankimuar pranë Komisionit të Prokurimit Publik, teksa kompania që ka depozituar ankesën pretendon se disa nga kriteret e kërkuara i plotëson vetëm 1 laborator në Shqipëri, duke kufizuar maksimalisht konkurrencën.
Sipas ankesës së depozituar në KPP, kërkohet që operatori ekonomik të ketë në përbërje të stafit një inxhinier që të jetë njëkohësisht edhe ekspert mjedisi i licencuar, ndërkohë që këtë kriter e ka vetëm një laborator në sistemin e Drejtorisë së Përgjthshme të Akreditmit.
Po ashtu, sipas ankesës janë bërë specifikime dhe kërkesa, që janë të pabazuara në ligj, sikurse është periudha e përvojës që duhet të zotërojë kompania që do të jetë fituese e tenderit apo përcaktimi markave konkrete të pajisjeve që duhet të zotërojë subjekti.
Procedura e prokurimit për monitorimin e parametrave mjedisore dhe hartimin e raporteve përkatës për inceneratorin e Elbasanit u hap në datën 17 gusht nga “ECO –ELB”, që është shoqëria e krijuar për zbatimin e detyrimit koncesionar të transferimit të impiantit të përpunimit të mbetjeve urbane, pas vendosjes nën sekuestro konservative të të gjithë aseteve të kompanisë “Albtek Energji”, që ishte mbajtëse e koncesionit.
Ndërkohë që, shpesh herë ekspertët e mjedisit kanë theksuar rëndësinë e monitorimit të ndotjes në inceneratorin e Elbasanit, për shkak të emetimeve që shkaktohen nga djegia e mbetjeve./Scantv.al/
Discussion about this post