Irina Romanova, shtetase ukrainase që kanë jetuar për një periudhë të gjatë në Shqipëri thotë se shtetasi ukrainas që u kap me dy rusët në uzinën e Gramshit është tradhtar.
Në një intervistë për Euronews Albania, ajo tha se nuk beson ata janë turistë apo blogerë siç pretendojnë, pasi një turist nuk ka arsye të sulmojë ushtarakët kur hyn në një vend që e di shumë mirë që është e ndaluar të hysh.
“Fatkeqësisht mes njerëzve që kanë pasaportë ukrainase ka plot tradhtarë. Ai është tradhtar dhe fatkeqësisht ka edhe tradhtar në çdo luftë”, tha Romanova.
Ajo përjashtoi mundësinë që rusët e kapur në uzinën e Gramshit të kenë qenë fotografë teksa shpreh bindjen se janë spiunë që kanë pasur objektiv një vend anëtar të NATO-s.
“Me ato që kam dëgjuar ata kanë hedhur lëndë kimike. Nëse janë blogerë dhe kanë shkelur pa dashje në një vend ku nuk duhet të kishin shkelur, duke u nisur nga vetja, do kisha kërkuar ndjesë. Pse duhet spraji neuroparalizues”, u shpreh ukrainasja.
Dy shtetas rusë, 33-vjeçarja Svetlana Timofoeva, 23-vjeçari Mikhail Zorin dhe një ukrainas janë arrestuar mbrëmjen e së shtunës pas një incidenti në uzinën ushtarake në Gramsh. Në dëshminë e tyre, ata kanë thënë se janë blogerë dhe fotografonin kryesisht territore ushtarake që janë të braktisura dhe nuk përdoreshin më nga shteti. /Euronews Albania
Discussion about this post