Titulli kampion për Teutën ka një bonus të jashtëzakonshëm për të ardhurat e klubit durrsak, që më së shumti ishte mësuar me pjesëmarrje në Ligën e Europës dhe jo në Champions. “Djemtë e detit” do të përfaqësojnë Shqipërinë në kompeticionin më të rëndësishëm për klube, Liga e Kampioneve dhe pritet të arkëtojnë rreth 1.2 milionë euro të sigurta.
Kjo llogari bëhet në rastin më të keq, pasi nëse Teuta arrin ta kalojë turin e parë në Champions, atëherë të ardhurat shtohen. UEFA i jep një bonus prej 260 mijë eurosh Teutës vetëm për faktin se është shpallur kampione e Shqipërisë. Ndërsa për pjesëmarrjen në turin e parë të Ligës së Kampioneve, UEFA akordon si shpërblim për klubet 280 mijë euro. Në rast se durrsakët eliminohen që në turin e parë, më pas kalojnë në turin e dytë të kompeticionit tjetër, Liga e Konferencës.
Për këtë, klubit i shtohen edhe 450 mijë euro të ardhura. Nga ana tjetër, për të drejtën televizive, durrsakët përfitojnë diku te 70 mijë euro, ndërsa FSHF jep si shpërblim 100 milionë lekë të vjetër për titullin. Kësisoj, Teuta tashmë ka në dorë një buxhet të shëndoshë, që sigurisht mund të dyfishohet nëse arrihen kualifikime.
