Policia e Shkodrës ka arrestuar 4 persona pasi kanë tentuar të kalojnë në mënyrë ilegale drogë dret Malit të Zi. Të arrestuarit janë Anton Voci 24 vjeç, banues në Kurbin, Laç, Ertjen Hysa 23 vjeç, banues në Kuçovë, Nikola Paravani 22 vjeç, banues në Tiranë dhe Enver Idrizi 64 vjeç , banues në Shkodër.
Këta persona janë paraqitur në Muriqan, në dalje të RSH-së, me automjetin tip “Benz”, me drejtues Enver Idrizi dhe pasagjerë tre të tjerët. Policia ka kaluar në vijën e dytë për kontroll më të imtësishëm personat dhe automjetin me të cilin qarkullonin.
Si rezultat i kontrolleve fizike, u gjetën sasi të ndryshme, të ndara në pako, lëndësh narkotike kanabis, ketaminë dhe ekstazi, të cilat, nga veprimet hetimore, rezulton se këta persona do t’i trafikonin drejt Malit të Zi. Lëndët narkotike, së bashku me automjetin me të cilin këta persona qarkullonin, shuma parash dhe 5 aparate celulare, u sekuestruan në cilësinë e provës materiale
Materialet iu referuan Prokurorisë pranë Gjykatës së Rrethit Gjyqësor Shkodër, për veprën penale “Trafikimi i lëndëve narkotike”, kryer në bashkëpunim, mbetur në tentativë.
Discussion about this post