Ish-kreu i Bashkisë së Mallakastrës: Kam qenë i diskriminuar nga Rama

Ish-kryetari i Bashkisë së Mallakastrës, Agron Kapllanaj ka zbuluar ditën e sotme se ka qenë i diskriminuar nga kryeministri Edi Rama.

Këtë e bëri të ditur, gjatë Komisionit për Reformën Territoriale. Me tonë të larta, Kapllanaj tha se kryeministri ka pasur preferenca të ndryshme kur vinte puna për ndarjen e financave.

“Sa i përket financave, duhet të marrë fund preferenca e një kryeministri apo një tjetër. Duhet një reformë, se nuk mundet që një bashki të ngelet në oreksin e një kryeministri, jap apo nuk jap financa. Unë kam qenë i diskriminuar nga Qeveria, ia kam thënë dhe kryeministrit, nëse projektet nuk janë cilësore më thuaj. Ky ishte oreksi i kryeministrit apo cilido qoftë tjetër ku lobojnë kundër zonës së tyre dhe qytetarëve që kanë zgjedhur. Diçka tjetër, njësitë vendore nuk duhen përdorur për fushata elektorale, duhet një ligj, numri i punonjësve të jetë i përcaktuar me ligj. Nuk mund që të shtohen, në vend që të shkojnë për rrugë e për financa shkojnë për militantë, bëhet një dëm i madh për këta persona të cilët i mësojmë si dembela e nuk gjejnë një punë për të ushqyer familjet e tyre. Dua t’ju bëj një thirrje ju si përfaqësues politik, le të mos marrim dhe të fillojmë debate se kush e ka kërkuar reformën e kush jo, të miratojmë një reformë të qëndrueshme për qytetarët”, u shpreh Kapllanaj.