Ministri Bledi Çuçi, pretendoi se oficerin që shoqëronte të shumëkërkuarin Ervis Martinaj, e zbuloi vet policia me pretekstin se po pastron të inkriminuarit. Se sa e besuesheme ishte kjo deklaratë e tij, na e treguan me zëvendësimin që bënë pas largimit nga detyra të Gledis Nanos.
Pasi iu deshën disa ditë për ta gjetur pasuesin, Çuçi dhe Rama na prezantuan me drejtorin e ri të Policisë së Shtetit, i cili është Muhamet Rrumbullaku. Emërimin e tij e arsyetuan duke thënë se është i vetmi me integritetin e duhur moral dhe profesional që mund të vinte në krye të Policisë, ndërsa se çfarë është thënë për të, mbetet thashetheme.
Mesa duket Rama dhe Çuçi kanë harruar se Muhamet Rrumbullaku është një nga personat që shfaqet në foton, i ulur me një person në kërkim për vrasjen e kryekomisarit Dritan Lamaj. Madje, fotoja që shihni më poshtë, shërbente si dokument për akuzat e Ramës që bënte në vitin 2013 ndaj qeverisë së atëhershme, se policia ishte e inkriminuar dhe se ajo foto i shërbeu të vinte në pushtet.
Për kujtesë, po risjellim denoncimin e Edi Ramës në vitin 2013, atëherë në opozitë, që i bënte qeverisë me foton në fjalë. Rama shkruante se qeveria nuk siguron dot as jetën e policëve, por përkundrazi luante me jetën e policëve, ndërsa foton e konsideronte si një histori rrëqethëse.
“Qeveria nuk siguron dot as jetën e policëve. Përkundrazi luan me jetën e policëve. Dihet botërisht se kupola e Policisë së Shtetit merr para për emërime në të gjitha nivelet e policisë. Por këtë herë ka të dhëna të tmerrshme se merren para edhe për shkarkime komisarësh, që flaken në rrugë dhe lihen në pritën e krimit. Media shkruan se është paguar lartë në kupolë, për të larguar komisarin e sapo vrarë. Historia e fotografisë së djeshme është rrëqethëse” – shkruan Rama në 28 shkurt 2013.
Pas 9 vitesh, krejt papritur Rama emëron me dorën e vet për drejtor të Përgjithshëm të Policisë, një nga personat që ishte në foton “rrëqethëse”.
Por qëndrimi i dyfishtë i kryeministrit nuk mbaron këtu. Rama tha se shkarkimi i Gledis Nanos, erdhi edhe pse promovoi oficerin i cili vrau fëmijën me skaf dhe këtë e bëri në promovimin që po i bënte Muhamet Rrumbullakut që e akuzonte vet ai për inkriminimin e Policisë.
Duke qenë se këto marifete në Policinë e Shtetit janë tash e 30 vite, kujtojmë se nga personat që shfaqen në foto i vetmi që sot nuk është në polici, është vetëm Agron Kuliçaj, të tjerët e kanë gjetur një “vrimë” për të hyrë sërish në Policinë e Shtetit.
Discussion about this post